Fatal riflesso!.... da quel ponto in botta
Nei studj immerso go cambià partìo,
E no avendo el cervel della marmotta
Qualche piccolo frutto ho conseguìo:
Una Musa picante, e zovenotta
Per maggior danno se m'ha messo drio,
E sepellido in mille cure amene
Passava allegri dì, notte serene.
Fortuna intanto che de starme arente
La s'aveva moltissimo stufà,
Trovandome ai so vezzi indifferente
E a chi ghe xe nemigo affezionà,
Trattandome da mato, e da imprudente
M'ha le spalle in un atomo voltà,
M'ha chiuso de risorsa ogni altra strada....
Dio difenda da donna inanemada.
Ridotto al caso de cercar panetto
De trar profitto dei me studj fati,
Santa Ignoranza ho cognossù l'effetto
Che ga quei che con ti se mostra ingrati;
Messo co chi fa soldi ancuo al spaghetto
Perdarla devo oppur ridurme a pati,
E za pur troppo in avegnir no falo
O cambio de bandiera, o resto al palo.
