In lode di Bianca Cappello duchessa di Toscana
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
Donca dal mio cantar
Ogni beltà più strana e più lontana
Averà tuto quel che 'l pol mai dar,
E sta pena vilana
5No vorà almanco un pochetin lodar
Tanta belezza e cortesia paesana?
Musa Veneziana,
La bate qua la reputazion:
E Modòna e Corezo
10E mile volte pezo
Va gloriose de le to' Canzon,
E l'onor de Venezia e de Fiorenza,
Anzi del mondo ghe ne starà senza?
Su, su, che te convien
15Meter del bon; nò che ghe sia fadiga,
Ch'assae resplende 'l Sol quando è seren,
Ma perchè no se diga
Che solamente riussimo ben
Con qualche sugetin de bassa liga.
20Qua no gh'acade miga
Tropi colori, nè tropa poesìa;
S'à da dir pan al pan,
Lodar i ochi e le man
Per quel ch'i è in fato senza dir busìa;
25Che s'i ochi ardesse, o le man fusse neve
Questa e quela belezza sarìa breve.
Dona bela e real,
Rica de tut'i beni de fortuna,
Più rica assae de quei che assae più vai,
30E richissima d'una
Parte ch'avanza ogn'altro don mortal
Senza la qual no val grazia nessuna;
Più reverìa d'ogn'una,
Abondante d'amici e servidori
35Tuti agiutai da vu;
Che se pol bramar più
Che d'ogn'intorno aver devoti cuori,
E che fazza ogn'un d'essi quanto 'l sa?
Tanto 'l diè sempre più quanto più 'l dà.
40Quela rara belezza,
Tuta fata per man de la Natura
Senz'agiuto nè d'aqua nè de pezza;
Pol comparir segura
In ogni paragon; che de certezza
45Ogn'altra perderà la so' ventura.
Vita fata a mesura,
Fazza proporzionà, chiara e ridente,
Ochi vaghi, amorosi,
Lavri rossi e vistosi,
50Boca tuta zentil, dov'ogni dente
Val assae più de bianchezza lu solo
Che quel bel fil de perle ch' avè al colo.
Tante zogie, tant'oro,
Tanti drapi de sea, tanti ducati,
55Tante delizie, e alfin tanto tesoro
Che renderla beati
Cento par mii, quand'anca ognun de loro
Se strapazzasse zo rasi e scarlati;
Tuti no ghe xe ati,
60Ma a vu ghe ne xe sta larga la sorte,
A vu che aidè i pupili
E i spiriti zentili,
E suplì a le disgrazie de la sorte.
Qualch'un el sa che senza 'l favor vostro
65Saria de la Fortuna al mondo un mostro.
Seno, valor, inzegno,
Destrezza, gran maniere, alto pensier;
Modesta vogia e merito d'un regno,
Sì prudente parer
70Che no gh'ariva ognun miga a quel segno;
E sia pur Savio Grando o Consegier;
Infinito piaser
De giovar con efeti e con parole;
Passar de vigilanza
75Chi ve fa qualche istanza;
Vertù, grazie e creanze al mondo sole;
Quest'è altr'oro, altre zogie, e queste stesse,
Spendè quanto volè, sempre le cresse.
De i amici ò dito e digo,
80Che quest'è un capitai che i passa tuti,
Che val più ch'un tesoro un bon amigo.
Quanti avè mai conduti
In gran felicità, fuora d'intrigo!
Altri avè in dolce servitù reduti.
85Oh benedeti fruti
De vertù e de fortuna zonte insieme!
Oh de tanto contento
Soave condimento,
Vive belezze, a mio giudizio, estreme!
90Ma che giudizio è 'l mio in tanta impresa?
Deh acetè 'l cuor se 'l dir ve fesse ofesa.
Mare del Dio d'Amor;
Superba ancora de l'alta sentenza
Ch'à dà el Pastor Trojan in to' favor,
95Te prego, abi pazienza,
Che no me move invidia del to' onor,
E molto manco altra malevolenza.
Se fusse in to' presenza,
E che ghe fusse anch'Elena in persona,
100Lu che t'à donà 'l pomo,
A far da galant'omo,
El ghen farìa do' parte, e la più bona
Sarìa de st'altra Dea che digo mi,
Nassua in mar pur, ma ben dopo de ti.
105E se per oferir
S'avesse da coromper el giudizio,
Co ti à inamorà un l'è finì el dir;
Questa pol far l'ofizio
De Giunon e de Palade, in fornir
110La zente de' richezza e de giudizio.
Del terzo benefizio,
Che speta a ti, no vòi dir se no questo:
Paris, gramo, meschin,
Ti 'l mandi peregrin
115Cercando Amor che se à da tior in presto.
Questa à belezza in cà sì pelegrina
Che farìa parer dolce ogni rovina.
Canzon, sta vita è un loto
Con poche grazie, e de le bianche assai!
120Mile se ne lamenta
Per un che se contenta,
Ma no gh'è stà si rica grazia mai!
A tute l'altre qualche cossa manca,
Qua stà tute le grazie in t'una Bianca.