Il tu, e il voi
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| Edission e fonte ▼ |
Nina, dov'è quei tempi
Che in barca da tragheto,
Su l'ora del frescheto
4Se andava a scorsizar?
Che sol de le to' grazie,
Del to bon far vestia,
Ti davi zelozìa
8A qualche Dea del mar?
Dov'è quei dì beati
Che un marendin bastava,
Che ambrosia el deventava
12Solo da ti tocà?
Che in mezzo al to matezzo,
Donandote a l'amante,
Ti 'l favi in un istante
16Felice ed inganà?
No ranghi, no tesori,
Te dava alora el cielo,
Ma el fresco, el bon, el belo,
20E un cuor inzucherà;
Anima morbinosa,
Ochieto biseghin,
Sen d'alabastro fin
24Sul torno lavorà.
Co tante grazie adesso,
Fresca, matona e bela
Chi, furba e baronzela
28No aveva a deventar?
Ti 'l geri, o caro ogeto,
E Amor, me lo perdona,
Furba cussì e barona
32Più te saveva amar.
Quanto è diversa, oh Dio!
Degnissima signora,
Sta vita che ve onora
36Da quei beati dì!
Quel omo grando e grosso
Che fè a la porta star,
L'imagine el me par
40Giusto del tempo a mì;
Par che da vu el descazzi
Co quel so bruto viso
Piaceri, amori e riso,
44Che nol li vogia più.
In fati, quei puteli
Mati, insolenti e schieti,
Sui richi vostri leti
48Trema de montar su:
Oh Dio! me li ricordo,
Vegnui per el balcon,
Sentarse a cufolon
52Su quel to letesin;
E far mile matezzi,
E ti scherzar con lori,
Riso, piaceri, amori,
56Pianzè 'l vostro destin.
No, quei tapei, signora,
Tessui per man d'Arane,
Nè quei che le persiane
60À ordìo co le so man,
Nè quela vostra tanto
Superba arzenterìa,
I piati co maestria
64Incisi da German;1
Quei vostri Gabineti
Fati a vernise fina,
Che l'arte de la China
68Ariva a suparar;
I vasi Giaponesi,
Le chichere del Vezzi,2
E quei tanti altri pezzi
72Che usè de doparar;
Quel padiglion magnifico
Che alzè co' se' in campagna,
Dove no sol se magna
76Al fresco i dì d'istà,
Ma che s'impianta spesso
Soni, festini e canti,
E tuto quel che incanti
80Dal mondo vien chiamà;
Le zoje che avè al colo,
Le bucole, i rechini,
E le perle e i rubini
84Che ai brazzi vu portè,
Le franze, i fiochi, i merli,
E tanti bei recami,
Le stofe ed i pelami
88Che a casse conservè:
In soma tuta quela
Pompa che Dea ve rende
Ai ochi che no intende
92La vera volutà:
Perdona, cara Nina,
No condanarme e tasi:
No val un per de basi
96De la to prima età.
- Note