Il canto del gondoliere
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← Romanza per soprano | Edission e fonte ▼ | Sogno d'una notte d'estate → |
![](http://upload.wikimedia.org/wikipedia/commons/thumb/c/cf/Le_Ci%C3%A0cole_de_Bepi%2C_Roma_1908_%28page_56_crop%29.jpg/400px-Le_Ci%C3%A0cole_de_Bepi%2C_Roma_1908_%28page_56_crop%29.jpg)
Frede acque e pesci cari,
Dolève del mio mal, de la mia doia.
A. Calmo, Madrig.
So Eminenza in gondoleta
Una volta gò menà,
Che l'andava a dir compieta
Dal Piovan de San Tomà.
Sbatociava le campane
E lu alegro el s'è voltà
E 'l m'ha dito: «Tita Nane,
Sastu cossa gò pensà?
«Gò pensà de farte prete
O per forza o per amor
E s'el tempo lo permete,
Te deventi Monsignor.
E cussì, se no te scapa
Qualca ostieta in venezian,
Tita Nane, i te fa Papa
E te regni in vatican.
«Per quel posto i xe zercai
I più bravi gondolier,
Te dirà el to premi e stai
Su la barca de San Pier!»
El scherzava, povareto,
Perchè in fondo el giera bon
E gò dito: — «Con rispeto,
Dio ne libara, paron.
«Eminenza, la me senta,
Preferisso de star qua
Con do fete de polenta
E la santa libertà!»
Co 'l gà inteso sta parola
El rideva che mai più
Ma el più pezo de la fola
Xe ch'el Papa el xe sta lu!
Basta! Gieri son vegnuo
Fina qua per un afar
E in sto mentre gò volsuo
Reverirlo e saludar.
Mare santa! In quel palazzo
Che xe un sbiro ogni canton,
Ogni porta un caenazo
E la spuza de preson.
Mare santa! Un poco avanti
Gò incontrà el zerimonier,
I gendarmi, i busolanti,
Zafi, guardie e camerier.
E sti fioi de bona zente
Me gà tuti esaminà,
Fin che Bepi finalmente
Lo gò visto e saludà.
Povareto! El giera bianco
E sutil come un sardon,
Con un ocio fiapo e stanco
Ch'el m'ha fato compassion!
Gò tirà una riverenza
E gò dito: ― «Che piaser!
Se recoldela, Zelenza,
Del so vecio gondolier?»
El pianzea co fa un putelo
E le lagreme ha bagnà
Calde, calde el santo anelo
Che in zenocio gò basà;
Po' el gà dito a 'ose lenta:
«Tita Nane, xestu qua?
Ah, do fede de polenta
E la santa libertà!»