Sogno d'una notte d'estate
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Il canto del gondoliere | Edission e fonte ▼ | Telefonata → |
.jpg)
Genes. XL, 8.
.jpg)
Che a mi me passa con dificoltà,
Sarà quel che ve par, ma el fato stà
Che quel sogno d'ancuo no gera belo.
Mi e San Piero vogavimo in batelo
Che pescàvimo granzi in quantità,
E pipàvimo in santa libertà
Governando el timon verso Torcelo.
Lu el me diseva: «Varda, Santità,
Quà no ti vedi un nuvolo nel cielo,
Ma non fidarte mai per carità!
El mar, come le done, el xe un flagelo
Che cambia sempre e tanti i s'à negà
Senza una crespa in mar, col tempo belo!
«Sèntistu, Bepi, come cambia el vento
Che adesso ghe l'avèvimo de drio?
Cussì cambia le cosse int'un momento
E, chi ghe toca, bonanote, adio!
Zà tuto sta d'aver quel sentimento
De tor intanto el ben che manda Dio,
De goderselo in pase e star contento
Da prete savio e veramente pio.
Cossa te serve romperte i cordoni
Perchè la Franza ancùo te fa la mata
E la gà in quel servizio i to sermoni?
Ti gòdite l'Italgià che xe fata
Come una gamba, dove i so paroni
I gà messo nel piè la to zavata».
«Aseni ― el seguitava ― aseni i preti,
Aseni tuti i frati che protesta
Co' el Governo li basa e ghe fa festa
E ghe mantien de più i analfabeti!
Dove xela, asenoni d'indiscreti,
Una cacagna simile de questa,
Dove la libertà se manifesta
Ne l'Indice, che i trema ai so decreti?
Aseni! No vedeu che l'abondanza
De le done, dei bezi e de la biava,
La dà el regno d'Italgia e no la Franza?..
E in quel mentre che mi revoltava,
El me dà do peae qua ne la panza,
Che, se no gera un sogno, el me copava!