Il Minuetto/Scena I

by Attilio Sarfatti

Il Minuetto
Bozzetto comico in un atto SCENA I Le Rime Veneziane e Il Minuetto Prologo

Scena II

Attilio Sarfatti ―  Le Rime Veneziane e Il Minuetto

Il Minuetto
Bozzetto comico in un atto

SCENA I

1890

Edission original:	Attilio Sarfatti, Le Rime Veneziane e Il Minuetto, Milano, Fratelli Treves Editori, 1892
Fonte:	Indice:Le Rime Veneziane e Il Minuetto.djvu

←  Prologo

Edission e fonte ▼

Scena II  →

Salotto in stile settecento. Un canapè, qualche poltrona. Uno specchio.

Nina e Anzoleta.

NINA

Dunque, cussì el v'à dito...

ANZOLETA

Po el m'à dà do ducati

Disendome: recórdete de taser...

NINA

E vu, infati,

L'avé obedio.

ANZOLETA

Credeva...

NINA

No abiè paura, no.

Xe tuta mia la colpa che ve go fato zo.
5Vu, da zovene onesta, dovevi dirme tuto.
Farse comprar? dasseno, sarave sta assae bruto.
Se tira i bezzi, posto che i ve li vol donar,
E po se parla istesso...

ANZOLETA

Parona mia, ghe par...?

NINA

Do ducati d'arzento...

ANZOLETA

Mi se no parlo, moro.

NINA

10Fusseli stai almanco do zechineti d'oro.
Alora... eh alora... forse... no xe vero, Anzoleta?

ANZOLETA

L'avaria dito istesso...

NINA

Sè una puta segreta,

Brava! da sto momento tuto ve contarò,
Co go qualche segreto, ve lo confidarò.
No 'l v'à dito che quelo?

ANZOLETA

15 Ah, sì! el m'à domandà

S'el Senator...

NINA

Chi, Momi?

ANZOLETA

Vien spesso a pranzo qua.

NINA

E basta?

ANZOLETA

Go risposto de no.

NINA

Va ben, va ben.

ANZOLETA

E no 'l m'à dito altro...

NINA

Dunque, stassera el vien.

ANZOLETA

Siora sì...

NINA

(a parte) Povareto! no 'l me ga mai scordà.

(ad Anz.) Dè qua polvare e specio...

ANZOLETA

20La servo, ecoli qua.

Stassera, ghe scometo, parona, che sior Tita...

NINA

Anzola, disé el vero, me stala ben sta vita?...

ANZOLETA

Un penelo...

NINA

L'ò fata in Merzaria da Sante...

ANZOLETA

La piavola de Franza no xe cussì elegante...

NINA

La stofa xe stupenda...

ANZOLETA

25Stupenda la fatura,

Ma, perchè la se vede, ghe vol la so figura.
Za lo go sempre dito...

NINA

Cossa disé, Anzoleta?

ANZOLETA

Per figurar a ela... ghe basta una strasseta
Co' quel vitin da puta...

NINA

I sona...

ANZOLETA

El cavalier...

L'è çerto lu...

NINA

30Gramasso, no 'l manca al so dover.

Coré a vérzar...

ANZOLETA

(fra sè) La dise che no ghe importa un figo,

Ma la se mete in gringole co capita l'amigo.

NINA

L'è qua... povaro Tita! vôi farlo star in pena.
(si sarà seduta e fingerà di leggere un libro).