Il Garzone Furlano
|
Edission original: |
Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 12.djvu |
| Edission e fonte ▼ |
1Tre zoveni bizari avea osservà
Che un Furlan per Garzon a un'Osterìa
Da pochi zorni gera stà impiegà,
E in testa gh'è vegnù sta bizarìa,
D'aspetar ch'el paron fusse lontan
Per far una burleta a sto Furlan.
2Entrai ne l'Osteria donca al Garzon
I à dito, de voler lori disnar;
E lu li à ben servii con atenzion,
Perchè i avesse contenti da restar.
Infati à magnà questi a crepapanza
Senza, per cussì dir, che roba avanza.
3Portà po el conto, uno de lori à dito,
(Siben ch'el conto fusse assae indiscreto)
A sto Garzon: Ti n'à servio pulito,
E se vede de più che ti è discreto,
Donca è dover pagarte intieramente,
Anzi la bonaman donarte arente.
4E tolta in man la borsa à fato veder
Che l'avea dei zechini e dei ducati,
Disendo: Amici, no vorè recreder
Che mi paga per tuti, perchè infati
Toca pagar a mi, mentre a disnar
L'altro zorno son stà senza pagar.
5Sior no, el secondo à dito, no convien;
Nè mai permeterò che vu paghè,
Avè pagà altre volte, e no va ben
Che sempre a l'Osterìa ne superchiè.
El terzo francamente à po sogionto:
A mì toca a pagar, amici, el conto;
6Ò magna a vostre spese i dì passai,
E dopo tante volte toca a mì.
El primo rispondea: No sarà mai;
E questionando i andava via cussì.
Infin quel'altro à dito: La question
Decida donca, amici, sto Garzon.
7E voltandose a lu: Caro fradelo,
Fenissi tì sto afar; te benderemo
Col fazzoleto i ochi, aciò che quelo
Che ti ti chiaperà, mentre saremo
Intanto qua aspetando quieti e muti,
Abia elo solo da pagar per tuti.
8Persuaso el Garzon, senza rifleter
A quel che podea nasser, e ch'è nato,
S'à lassà ai ochi el fazzoleto meter,
E mentre ch'elo andava via de fato
Cercando qua e de là chiapar qualcun,
Da l'Osteria bel belo è scampà ognun.
9Xe arivà in quel momento el so' Paron,
Che gnente no saveva de sto afar,
Urtando senza acorzerse el Garzon,
El qual mo suponendo de chiapar
Un de quei tre, ga chiapà aponto lu,
Disendoghe: Pagar ve toca a vu.
10Oh pofardio! crederò ben de sì,
Informà de la cossa, à dito l'Osto,
Che pagar, sior minchion, me toca a mi.
Vostro dano, mi gaveria risposto:
No bisogna fidarse dei Garzoni,
Ai negozj à da tender i Paroni.