I quattro Ritratti
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← Cerere, Giove, e Mercurio | Edission e fonte ▼ | Difficoltà dei matrimonj → |
I strambezzi ze varj in sto mondazzo,
E mi de gnente maraveggie fazzo,
Massima dopo un caso,
Che un postesin desidera in Parnaso.
Un zorno da un pittor
Ritratista famoso,
Riva un tal, che accennandose per sposo,
Vol aver della tal presto el ritrato,
Ma vestida da inverno, e ch'el sia esato.
Accetà dal pittor la commission;
No passa quattro dì,
Che arriva un altro, e vol in conclusion,
Che della stessa tal, che digo mi,
Vegna la miniatura esata e vera
Eseguida vestida in primavera.
Ride un poco el pittor dei comittenti,
Ma no vien messi in campo i antecedenti.
Chi el crederave? un terzo da là un zorno
Vol de sta istessa el ritratin goloso,
Ma diverso de forme, e de contorno,
E l'ordine lu dà,
Perchè messa la vegna in tutto istà.
El pittor squasi più rompe el secreto,
Ma aspettandose un quarto el tira dreto.
Forse una settimana,
No l'è gnanca passada,
Che sto quarto da suso in gran premura,
E vol la miniatura
De sta tal benedia, ma lu gnessuno
Prefinisce vestiario, onde el pittor,
Che sa l'antecedenza, a sto signor
Pensa de farla in abito d'autuno.
Servidi i commitenti,
Restai paghi, e contenti,
Senza mai imaginarlo i ga donà
Oltre la paga, la più giusta prova
Dell'odierna femminea fedeltà,
Che come la fenice se rinova
Tutte le volte che ghe xe occasion,
Senza certi riguardi, e distinzioni.
.jpg)