Difficoltà dei matrimonj

by Luigi Martignon

3 Difficoltà dei matrimonj Raccolta poesie veneziane dell'autore dei Capricci poetici nello stesso dialetto stampati nel 1819 Raccolta poesie veneziane dell'autore dei Capricci poetici nello stesso dialetto stampati nel 1819/Parte seconda I quattro Ritratti Strambezzo per Nozze Luigi Martignon 1826 XIX Poesie

Indice:Raccolta poesie veneziane dell'autore dei Capricci poetici nello stesso dialetto 2.djvu

Luigi Martignon ―  Raccolta poesie veneziane dell'autore dei Capricci poetici nello stesso dialetto stampati nel 1819  ― Parte seconda

Difficoltà dei matrimonj

1826

Edission original:	Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826
Fonte:	Indice:Raccolta poesie veneziane dell'autore dei Capricci poetici nello stesso dialetto 2.djvu

←  I quattro Ritratti

Edission e fonte ▼

Strambezzo per Nozze  →

Difficoltà dei matrimonj

Per maridar ste fìe,
     Che povarette sta ligade al palo;
     Per torsele dai pìe,
     Cossa un povaro pare ancuo no falo?
     5E le mame industriose
     Quanti precetti no ghe vale dando,
     E tutti quanti per el più de bando?
     Una che vecchia xe vegnuda ormai
     Fra desiderj assae mal soddisfai,

     10Ga de putte una mua,
     Una piuttosto fatta, e st’altra crua,
     Ch’el bisogno le avarave in pien,
     Trovandose un marìo che mai no vien,
     Co le sorte de casa un fià a spassetto
     15Per storto la le varda, e po per dretto,
     E po, via Catinetta
     Ste co la vita dretta,
     De dia parè spalada,
     Cossa dirali chi ve vede in strada?
     20E vu Grazietta un poco più tegnì
     Alti quei brazzi, e dretta quella testa,
     No ve scordè, sentì,
     La riverenza, che vu fe alla festa:
     Stretta un fià quella bocca, e vu Catina
     25Tegnighe l’occhio drio co la camina,
     Saludè sior’Albetta,
     Deghe un baso, e se a farghe compagnia
     Trovè qualcun, no stessi a vignir via.
     Se i ve domanda se ste ben, co un grazie
     30Diseghe tutto, che cussì ne insegna
     Parigi, mare delle bone grazie.
     In somma co quel ton che proprio impegna,
     Brave, quanto se belle,

     Contegnive da svelte: addio putelle.
     35Ma tutti sti smorfiezzi,
     Sti veri putelezzi
     Che un trionfo promette el più sicuro,
     No cava, lo so mi, sangue da un muro.
     L’ha d’esser dote, la vol esser roba
     40Per maridar la goba,
     Oppur tali virtù
     Che in sto secolo qua no ghe xe più.