I pelegrinagi
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← La giustizia moderna | Edission e fonte ▼ | A çerti zornalisti moderati del zorno → |
Quando la zente impavida
Coreva co' baldanza
A liberar dai turchi
La schiava tera santa,
Quando regnanti e popoli
Col segno de la crose
Ciamava tuti a l'armi
Alzando ben la vose,
E che le tre assae celebri
E storiche crociate
Gaveva le Nazion
Meze quasi desfate,
Alora gera el Spirito
Santo che le moveva,
De religion la fiama
Ogni anima invadeva.
Adesso xe un altro idolo
Che move futi a frote
E che fa andar a Roma
De miera e più de cote
De gnocchi cristianissimi,
Che no capisse gnente,
Lo scopo che se move
Ancho po' tanta zente.
No xe rason santissima,
Li move sol 'na idea
Che xe sbagliada in massima
Ch'el popol sol ricrea.
Sti pelegrini docili
Va a Roma senza capa
Per ben magnar e bever
Per liberar no el papa.
I viagia molto comodi,
No co' descalzi i pie',
Ma de agnus-dei coverti
Cantando avemarie.
Oh religion che in mascara
T'à messo i sacerdoti
Dov'è la fede stabile
I veri santi voti?...
Sì, Cristo là nel Golgota
Moriva per i umani,
E a Roma el sucesor
Riceve a piene mani
L'obolo forzatissimo
Che porta i pelegrini,
Che sempre inconsapevoli
No i sa de so destini.
Dov'è l'antica massima,
De Cristo santa usanza,
De dar a chi à bisogno
Ciò che ne sopravanza!
Ecco come da stolidi
I fa che i comparissa;
Ma intanto i se diverte...
Taso e po tiro strissa