La giustizia moderna
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← A un Ministro | Edission e fonte ▼ | I pelegrinagi → |
Fata co' elastisco
De forte susta,
Sconta benissimo
Drento una busta,
Balanze, merito,
Spada in canton
Ti fa Giustizia
Tuto in scondon.
La pena candida
Col toco e toga,
Novi zogatoli
Perchè se zoga.
Co' novo metodo
Ti svolgi pronta
Del novo codice
Pagina sconta.
Se mai giudizio
Ti dassi bon
Pronta a cambiar
Ti sa de ton.
Ghe el tal articolo
Che te sorege,
Che cambia afato
Facia a la lege;
E ti da celebre
Prestigiator
Conservi intato
Tuto el to onor,
Ti resti l'idolo
Imacolato,
Giurisprudente
Senza pecato,
Anzi de titoli,
Onor e lode
Te se tributa
Per sta toa frode,
Da ciò imperterito
Prima de sera
Ti sa sicura
Xe la cariera.
Scondi Giustizia
Scondi i to emblemi
Che za roversa
Xe la toa Temi.
Ma ti integerimo
Bon magistrato
Resta incrolabile
Che quanto i à fato.
Assae prestissimo
Sarà scoverto,
Perchè el camin
Xe sempre averto
A la più splendida
De verità
Che quei fedifraghi
Condanerà.