A çerti zornalisti moderati del zorno
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← I pelegrinagi | Edission e fonte ▼ | El Socialismo → |
Quando le sorti italiche
Tuta speranza gera,
Quando s'à fata libera
Gran parte de sta tera,
Quando ministri e popoli
No andava ben d'accordo
Ma che un pensier comun
Gera nel disacordo;
Alora meschinissimo
Numero de zornali
Ciamar ben se podeva
De ultra liberali.
De gran battaglie numero
Fra questi e i moderati
Nasceva co lo scriver
Articoli assenati.
Alora se co' impeto
De generoso sfogo
Vegniva scriti articoli
De anema e de fogo,
No gera odio e invidia
Per ambizion delusa;
Ma aspirazioni nobili
Scienza ghe gera infusa.
Adesso come retili
I strissa e i spande bava,
I suscita disordini
E dopo i se la cava,
E spudorati scriver
In ton da moderati
Vedo sti paladini
Che gera un dì esaltati,
Sti organi cartacei
Vilmente po' vendui,
Da sciochi deputati
I vien sì mantenui,
Per lori la giustizia
Xe fata a modo suo,
Xe lori che vol veder
El popol tuto nùo.
No i sa conoscer ordine
Che quel de la Questura
Che pronta xe a socorerli,
Con amorosa cura,
Quando i ga dito infamie.
O i posa da spavaldi,
Quando tratà i ga i popoli
Da stupidi e ribaldi,
Quando de la santissima
Nostra costituzion
I à scrito cose oribili
Metendo confusion,
Quando sfogà i gà in publiche
Questioni e anca private
Quela soa bile ingenita
Co' miera de sfuriate,
Quando dal quieto viver
I à tolto le cità,
Quando col so' proceder
Fin le Università,
I à calpestà vilissimi,
Co reproba parola,
Nobili azioni fate
Da una intiera scuola.
Xe questo amor o reprobi
Che avè de patria in sen
Che ve coverse el cuor
Co' bile e co' velen!
Ah! no savè cadaveri
De sta generazion,
Che in modo tal se mina
Le nostre istituzion!
Che infin ghe se prepara
Ai zoveni venturi
No' amor de sto paese
Ma un odio de più duri!
E no se mete subito
Un fren da sto Governo
Se lassa che sti perfidi..
Suscita tanto inferno!
O carità de patria
Sera la boca a chi
Tanto te ama e stima
E à congiurà per ti!