I canarini

by Berto Barbarani

3 I canarini I due canzonieri I due canzonieri/Libro V - Le adesine Quà dove l'Adese Barufe Berto Barbarani 1911 XX Poesie veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro V - Le adesine

I canarini

1911

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  Quà dove l'Adese

Edission e fonte ▼

Barufe  →

I CANARINI.

I.

Gh'è ne l'aria del vicolo
come una polvarina
che fa la balarina
su e zò par l'introl...¹

E gh'è drento la porpora,
e gh'è drento l'argento
e la zuga col vento
ne le spere de sol...

Così vien che le càmare,
anca quele più brute,
le se ilumina tute
le se scalda un tantin...

E ne l'aria del vicolo
pian, pianin, come in falo
mola el becheto gialo,
el primo canarin!

II.

E scominçia el miracolo...!
Nele nostre piassete,
moscardini e morete
i se guarda col cor...

E tra i giri de l'organo,
pian pianin, come in falo,
i se missia² nel balo,
i combina l'amor...

Senti, senti che ciacole,
senti, senti che estro...
Ah, l'è un bravo maestro
pien de musica el sol...!

E la furia de l'organo
li fa andar come el vento,
fin che a un çerto momento
i se basa sul col...

---

Note

1. introl: sinonimo di vicolo.
2. i se missia: si mescolano.