I Vissiganti
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← El Zerbin in trapola | Edission e fonte ▼ | El Vitalizio → |
Curioso de saver cossa ghe sia
Da novo per sto mondo un certo tal,
Corre a una spezieria,
Tol subito el giornal,
Pusa i polsi sul banco, e co do occhiae
Squadra de quello tutte le fazzae.
Finida la lettura,
Via lo chiama un affar d'alta premura;
Ma dopo una mezz'ora
Sente ai polsi un brusor che lo divora
Nol sa quello che sia,
El teme malattia,
La testa se ghe scalda, e la ghe zira,
El tosse, el susta, infin squasi el delira.
In mille affanni immerso,
Col cuor perso per perso,
Dal so spezier da novo el se incammina
Medego ricercando, e medicina.
Quando l'è drento, el sente ch'el paron
Al zovene disea: » se i fosse stai
» Confetti, o buzzolai,
» Pol de torli vegnir la tentazion,
» Ma portarme po via de vissiganti....
» Cossa no robarai d'ora in avanti?
A sto discorso in botta
Quel tal se varda i polsi, e ziga oh dio!
Ah ch'el ladro son mi compare mio.
Qua el conta l'accidente,
Se ride allegramente,
Passa de bocca in bocca el bel casetto,
Che vol logo per forza in sto libretto.