El Zerbin in trapola
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← La Polenta incisa | Edission e fonte ▼ | I Vissiganti → |
Za che la tavola
Sta sul finir,
E Bacco in stomego
Se fa sentir,
Lezè la frotola,
Che v'ho stampà.
Don Scarabatolo
Fu mio maestro
Vol che in sti anedoti
Abbia dell'estro:
Mi no lo giudico
Decidarè.
Viveva a Tripoli
Trent'anni fa
Un certo zovene
De qualità,
Che in vita celibe
Volea restar.
Ma de quei celibi,
Che va su, e zo,
Non contentandose
Gnanca de do,
De quelle zizole,
Za me capì.
El gera zovene,
E ben vedè,
Che questo un titolo
Subito l'è.....
Rapporto a spirito
Cussì, e cussì.
Passion terribili
Formae da lu,
Ghen giera quindese
Se no de più....
Lu gera un idolo
Lu un altro Adon.
Studiava l'etica
Questa de quà,
Ipocondriaca
St'altra de là,
E squasi misere
Tutte per lu.
Naturalissimo
Che andando avanti
Schiave facendose
Tante galanti,
Ghe avesse el tossego
Da capitar.
Cossa se penselo?...
Nol credarè;
Pur fedelissima
Storia la xe:
Pegni ridicoli
Lu dà d'amor,
E immaginarvelo
Saveu per chi?
Per na gobissima
Longa cussì,
Da star in tavola
Drento a un deser.
Gavea a sto stropolo
Mare natura
Fatto un insulto
Nella figura,
Ma raro spirito
Gaveva dà.
Studia del zovene
Le inclinazion,
Vede dei palpiti
Za la rason,
E quel ridicolo
Che se vol far.
L'avvisa subito
Do so parenti
Pezzi de zoveni
Putti valenti,
Che molto dopara
Ben el baston.
Xe teso el rocolo,
La goba è in moto,
El puto in gringola
Vol far casoto,
La porta avrindose
Lu corre su.
Scomenza el dialogo....
Xe i fradei sconti....
Dei modi illeciti
Ga el putto pronti,
Violenza, e spirito
Le par tutt'un.
In scena i zoveni
Salta furenti
Do silogistiche
Legnae potenti,
Ghe quieta i spiriti
Lo tien fermà.
E come a Tripoli
Se copa presto,
Nè i brodi logici
Là rompe el cesto,
Poco a risolverli
Ghe manca za.
Curte l'è in trapola
No ghe risorse,
La gobba, e subito
Bisogna torse,
O semo a Tripoli,
E lu xe andà.
Ecco un anedoto,
Che ga el so sugo:
A stretti calcoli
No ve ridugo,
Se a vu xe facile
L'applicazion.
.jpg)