El Vitalizio
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← I Vissiganti | Edission e fonte ▼ | Dialogo tra Parona, Camariera, e Papagà → |
Stuffo un signor de manizzar le rendite
Che un so vecchio avaron gavea lassae,
E seco de restar sempre el paziente
De questo, o quell'agente,
No podendo formar tutta una vendita
Pensa al ripiego, e pol trovar che Tizio
Co lu forma a bon patto un vitalizio.
Gnente megio: no ghe più necessario
Nè un magna pan, nè un omo che ghe roba
Xe imbotta sparagnà più d'un salario,
Al salvo xe la roba,
E l'ha trovà nel so vitaliziante
L'amigo onesto, che no sta a man zonte,
Perchè un crepo lu daga ad ogni istante.
El se amala mo intanto, e la facenda
Va formandose seria: i so parenti,
Che no podea sperar più da marenda,
Natural che i lo scorda in quei momenti,
E solo della porta
Perpetuamente in man ga el campanello
Chi? quel del vitalizio?... Oh giusto quello.
L'amor, la tosse, l'allegria, e la pena
Xe quattro cosse che no sta mai sconte;
Della letizia nell'immensa piena
Nol ga risorse pronte,
Per far gnanca supor vero l'affanno,
E deventa patoco cognossudo,
Che la bocca col cuor stava in inganno.
El malà se ricupera, e lu intanto
Vol radopiar le so dimostrazion
Ma pochi ghe che no lo creda impianto
Se adesso in conclusion
Più no ghe xe che sordido interesse,
E de ste burle se ghen vede spesse.
Voleu che qualcun v'auguri la morte?...
Basta che un qualche affar fe de sta sorte.