Giornale dell'assedio di Costantinopoli 1453/20
|
1856
|
|
Edission original: |
Nicolò Barbaro, Giornale dell'assedio di Costantinopoli 1453, a cura de Enrico Cornet, Vienna, Libreria Tendler & Comp., 1856 |
|
Fonte: |
| ← 23 aprile 1453 | Edission e fonte ▼ | 28 aprile 1453 → |
A dì vinti quatro de questo, zoè de April, ser Jacomo Coco patron de la galia de Trabexonda, tolse do nave de zerca bote cinque cento l'una, e quele atorno le investì de sacchi de goton e de sacchi de lana per muodo, che non iera possibil cosa che botta de bombarda i dovesse nuoxer, per granda che la fosse. Abiando messo in ordene queste do nave, non è possibel cosa, che queste nave possa investir questa armada, senza aiuto de galie over fuste, sì che adonca non possando andar le nave senza ajuto de galie, fo messe in ordene do galie sutile, e zascaduna galia grossa armò una fusta de l'imperador de banchi vintiquatro l'una, e zascaduna nave armò una de le sue barche grande. Siando messo in ordene tuta questa armada, per voler andar a bruxar l'armada del nemigo, el fo messo ordene, che a un ora de note, tuti fosse in ordene con i so fusti, per dover investir in quela a la meza notte, e al ora de mezza notte tutti si se reduxe suxo la galia de misser Alvixe Diedo, el qual iera capetanio del porto, e lì fo deliberado o sì, o no, de tuor quela intromission, e la mazor parte si fo de parer de dover andar a investir a questa ora de meza note, e lì, subito investidi, cazar fuogo dentro de l'armada del Turco. E in quela fiada i Zenovexi de Pera, nemigi de la fede cristiana, si vene a presentir questa cosa, che nui volemo bruxar questa armada; de subito el podestade de Pera1 si mandò do di suo Zenovexi per imbassadori al signor Turco, il qual si iera a S. Romano intorno le mure di Costantinopoli; e in nel parlamento che fexe i Zenovexi in la galia de misser lo capetanio, lor cani traditori de Zenovexi si dise: misser lo capetanio questa note non sun da dover tuor tanta intromission vui soli, ma si vui induxiadi2 a una altra note, nui zenovexi de Pera se oferimo a dover esser in vostra compagnia, per bruxar meio questa sua armada. El nostro capetanio, aldando3 queste oferte si romaxe contento de dover induxiar a una altra note, e quando Zenovexi vete esser zorno, e abiando lor paxe con el Turco, aprì una de le porte de Pera, e mandò fuora uno al Turco, el qual ha nome Faiuzo, e questo Faiuzo, siando al pavion del signor Turco, e a quelo lo i fe' asaver come Venitiani, la notte passada, se mise in ordene de andar a cazar fuogo dentro de l'armada del mandrachio de Pera. El signor Turco abiando intexo queste parole, rengratiò molto questo imbaxador da parte de queli de Pera, e subito quelo el signor el mandò in driedo in Pera. Partido che el fo da lui, el dito signor Turco de subito si mandò assaissimi scopettieri a la sua armada, che iera in nel mandrachio, e oltra i scopeti el fexe metter do bombarde a raxo4 la marina, e do altre bombarde da l'altro ladi del mandrachio, e atorno via del dito mandrachio tutto si iera ben reparado de gradizi, che schiopetto non li poteva nuoxer, ni anche veretoni5, per muodo che lor se tegnia seguri, e questo tal tradimento fexe i maledetti Zenovexi de Pera rebeli de la fede cristiana. —
Da dì vinti quatro fino dì vinti otto del ditto mexe, stessemo suxo questo fatto de questa tal intromission, ma pur penso la fosse volontade de Dio, che el volse, che se andasse, per punir i peccadi de alguni de quelli che andò, come per avanti vederete el caxo terribele seguido, avisandove, che nui Venitiani non saveemo nulla del trattado de questi malvaxi Zenovexi.
- Note a cura de Enrico Cornet (1856)
- ↑ Anzolo Zacaria da Pera, lo fece saper al Turco. Nota in margine. Angelo Giovanni era il nome del Podestà, e commissario di Pera. Vedi: Serra storia dell'antica Liguria. Capolago 1835. Vol 3. pag. 195. nota 2.
- ↑ v'indugiate.
- ↑ udendo.
- ↑ rasente.
- ↑ Verrettoni, specie di grossa verretta, ossia freccia a foggia di piccolo spiedo, che lanciavasi dagli antichi italiani con mano, o colle balestre.