El sposo
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← La striga galante | Edission e fonte ▼ | El scapolo → |
EL SPOSO
Go i mii ani e me vogio maridar,
Ò catà fora una zentil putela;
No l'è giusto una Venere modela,
Ma la me piase per el so bel far.
Note e zorno me meto in sentinela,
Per starghe drio trascuro ogni altro afar:
Sta facenda la vogio destrigar
Prima che la me rompa la scarsela.
Ò perso in carne 'l quindese per cento;
E se vardo el listin del zorno avanti,
Sta cagna de passion tende a l'aumento.
Vedo che a sto figher s'impica tanti:
Sin che no provo no sarò contento....
Anemo, su, Tonin, metete i guanti.