El scaldin

by Antonio Negri

3 El scaldin In gondoleta. Barcarole e rime veneziane Tra barcarioi Su l'aqua limpida Antonio Negri 1895 XIX Poesie

Indice:In gondoleta.pdf

Antonio Negri ―  In gondoleta. Barcarole e rime veneziane

El scaldin

1895

Edission original:	Antonio Negri, In gondoleta, Barcarole e rime veneziane, Milano, Carlo Aliprandi, 1895
Fonte:	Indice:In gondoleta.pdf

←  Tra barcarioi

Edission e fonte ▼

Su l'aqua limpida  →

EL SCALDIN¹

---

Son tondo, son picolo,
     Son fato de tera;
     In mezo a le tecie²
     Son stà fabricà;
     5E quando che luçido
     Gnancora³ no gera,
     El mogio,⁴ el sol torido,
     Poarin,⁵ go provà.

Lavoro finissimo
     10Mi d'esser no credo;
     Ufizio ben umile
     Me incorzo⁶ d'aver:
     De piati, de cicare⁷
     Fradelo me vedo,
     15El mio gran artefiçe
     Xe stà un.... pignater⁸.

De mi se desmentega
     Per più de mezo ano
     Chi amigo carissimo
     20M'à za dito un dì;
     Ma questo xe un utile
     Piutosto che un dano,
     Perché xe più façile
     Che dura cussì.

25Co' ariva qua el tiepido
     Calor de le ariete,
     Finisso el servizio,
     Finisse el dafar,
     E fra ratatuie⁹
     30Al scuro i me mete,
     Finchè vien i brividi
     A farve tremar.

Co' casca la candida
     Zentil biancolina,
     35Co' 'l vento che fisćia
     Vien zo dal camin,
     I vien torme subito
     Per 'ndar in cusina:
     Alora i desidera
     40L'amigo scaldin!

E co' bronze e cénere
     Go dentro e son caldo,
     'Na tosa, vardandome,
     Se scalda le man....
     45E mi, contentissimo
     La vardo e la scaldo:
     Xe caro, carissimo
     Per mi el fredo can!

E quando, nel massimo
     50Del fredo, i penini¹⁰
     Se ingiazza, e informigola¹¹
     Nel streto stival,
     De soto le cotole¹²
     Piaçeri divini
     55Mi godo, e fantastico....
     No gh'è nissun mal.

Scaldando, godendome,
     Mi passo l'inverno,
     Per questo desidero
     60Che svola l'istà....

     Al fogo me abituo,
     No temo l'inferno....
     El fredo più rigido
     Più caldo me fa!...

---

1. El scaldin = il caldanino.
2. tecie = tegami.
3. gnancora = non ancora.
4. el mogio = il mollore.
5. poarin = poverino.
6. incorzo = accorgo.
7. cicare = chicchere.
8. pignater = pentolaio, stovigliaio.
9. ratatuie = oggetti in disuso (termine generale).
10. penini = piedini.
11. informigola = si intorpidiscono.
12. cotole = sottane.