El podestà
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Terminà el regimento, a un podestà
Ga fato da un regazzo la cità
Recitar in latin un'orazion:
Ma lu gera un c...
5Che no capia el latin:
L'avea però vicin
El cancelier che molto lo intendea,
E a lu l'a dimandà, cossa che avea
Dito el regazzo in pien
10Co quela so orazion.
Risposto à el cancelier, che in conclusion
Le lode la contien
De la so casa. Infati
Per casa elo intendeva i so antenati,
15Ma el podestà a capio tuto a roverso,
E credea viceverso
Che l'intendesse del palazzo dir,
Fato da lu da novo costruir.
Fenia po l'orazion, dal podestà,
20Per basarghe la man, el puto è andà,
E a questo lu ga dito:
Amigo, ve ringrazio che pulito
Gavè dà de le lode a casa mia,
Ma bisognà avaria
25Che visti avessi tuti i mii mezzai,
Che ò da novo adobai,
Mentre sicuro vu
Gaveressi podesto dir de più.
E questi gera quei
30Che andava a governar cità e castei.