El carneval de Venezia

by anonimo

3 II. El carneval de Venezia Marco e Tòdaro I. Amor ghe vede III. Per chiusa de un garanghelo in campagna anonimo 1886 XIX

poesie

Anonimo ―  Marco e Tòdaro

II. El carneval de Venezia

1886

Edission original:	Anonimo, Marco e Tòdaro, versi in vernacolo venezian de un mestro de Canaregio, Venezia, tipografia antica ditta Cordela, 1886
Fonte:	Indice:Marco e Tòdaro.djvu

←  I. Amor ghe vede

Edission e fonte ▼

III. Per chiusa de un garanghelo in campagna  →

II.

EL CARNEVAL DE VENEZIA
NEL 1867¹

« Sti bacani, sto borezzo,²
Sto sussuro, sto fracasso,
Se el va avanti de sto passo
4Dove valo mo a finir?... »

Cussì dise certa zente
Che de tuto ga paura,
Che par fata da natura
8Per sustar, per brontolar.

Ghe fa spezie a ste marmote
Le gran frache,³ i zapegoni:
I spentoni, i pizzegoni
12Li fa tuti spasemar.

Mi, per mi, sto diavolezzo,
Sto morbin, sta confidenza,
Sto trovar una celenza⁴
16Giusto a brazzo de Arlechin;

Sto tratarse da fradei
Siori, artisti e povareti;
Sto combater de confeti,
20O de scherzi tuto al più:

Sto pensar che ga làoro
Per sti chiassi tanti brazzi,
E che tanti povarazzi
24Se guadagna in fondo el pan:

Mi ste cosse drento via
Me produse un certo efeto....
Mi ste cosse, digo schieto,
28Le me slarga proprio el cuor.

Xe ben vero che a sto mondo
Gh'è qualcossa anca de serio,
E che spesso el desiderio
32Dei bagordi torna zo;

Ma mi so che co se canta,
Se lavora più de gusto,
E che l'omo che xe un susto
36Nol fa gnente o nol fa ben;

E po' so che l'omo alegro
Senza falò Dio l'ajuta;
Ma una ciera scura e bruta
40La xe un pessimo segnal.

Dunque alegri! mi concludo,
Che se andemo de sto troto,
E se unisse al chiasso, al moto,
44El bon gusto, e 'l saver far;

Se framezzo a sti bagordi
La prudenza no va via.
Se el bon cuor, la cortesia
48Se fa largo fra el morbin;

Se el morbin no xe una mascara
De stravizi e de pecai:
Se al Signor nol ghe tol mai
52El rispeto che ghe va;

Se Venezia se recorda
Che la ga da far ancora,
Per tornar quela Signora
56Che la gera in altri dì;

Se la zente no desmèntega
Nè famegia, nè làoro;
El borezzo xe un tesoro,
60Xe una mana el Carneval.

---

Note a cura de l'autor

1. Fra i Carnovali di Venezia dopo l'anno 1866, quello appunto del 1867 fu il più spontaneo e più gajo, e perciò di maggiore buon gusto; e faceva sperare che ne avremmo avuto di poi anco di migliori. Come fortuna va cangiando stile!!!
2. borezzo — vivacità piacevole, o bizzarria.
3. fraca — folla, gente pigiata ecc.
4. celenza — eccellenza in maschera, o come dicesi anche, un lustrissimo.