El bastardo
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← La strada poareta | Edission e fonte ▼ | Carboneta → |
El vedeleto el nasse da la vaca,
l'agnelin g'à 'na pegora par mama...
E questo qua el fa «bee» quando el la ciama
e da la teta[1] mai no 'l se destaca;
e la cagneta che l'è piena[2] e straca,
la fa i cagneti e dopo la li sfama;
el lugarin fa el nio tacà a la rama,
e 'l guarda ben che i ovi no i se maca.
Ma ti, che i tà catà drento una ciesa
fato su in t'un sial vecio, o soto un ponte,
o in campagna, in te un prà, longo la sèsa,[3]
o in te un portego scuro sensa fondo,
in meso a un giro de stradete sconte,
bruto bastardo, ci t'á messo al mondo?
Ti, te andarè remengo par la tera,
fiol de nissuni, servitor de tuti,
parando in volta un caretin de fruti,
co 'na scrofola in parte, par bandiera.
E soto el timbro de sta macia nera,
da farabuto in meso ai farabuti,
come una rama che no g'à mai buti[4]
passarà, passarà la primavera!
Eco! To pare el capita in carossa,
e mai più lu el se imagina che ti
te cori in volta par ciapar qualcossa!
Forsi to mama in giro a far le spese,
se ocor la vegnarà a fermarse lì
par questionar su un chilo de sirese!
Po', un bel giorno, la févara[5] te ciapa,
te scota i polsi e àida[6] a l'ospedal...
Oh, da quel sito, quando se sta mal,
da quel sito che là, no se ghe scapa!
I te dise che là se sta da papa,
medissine, dotori, un carneval,
ma lì a rente l'udor del funaral,
ma la morte che ride co la crapa![7]
E a la festa, nissun se ferma mai
par dirte «ciao», ma tuti i tira avanti
a portar su altri leti i so regai...
Ma ti, alora, col fià da moribondo,
maledisseli pura quei birbanti,
che i t'à lassado dopo messo al mondo!
- Note