Carboneta
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← El bastardo | Edission e fonte ▼ | El gobo → |
In quel sporco granar de gran palasso,
gh'è un demonio de rati che rebuta!
Da un pare vecio e da una mare bruta
sempre malada, sora un leto strasso
dove a la note par scaldarse, in fasso
la fameieta se ransigna1 tuta,
Carboneta l'è nata par la suta,
co una voia de fraga soto el brasso.
Carboneta, savio, no la g'à vissi,
e gnanca un specio da speciarse el viso,
e gnanca un fero da stocarse i rissi;
ma i cavei carbonela e i oci neri
dove sluse un canton de paradiso,
con qualche teraina2 de pensieri.
«Carboneta, to mama l'è malada,
va a la filanda a guadagnar qualcosa...»
E Carboneta, la se mete in strada
e la sta fora fin su la tardosa.3
'Na sera, terminá la so giornada
la porta a casa un bocolo4 de rosa...
Busiara, vergognosa....
I è vegnudi a contarme, che i t'à visto
col capo-sala...
No, che no l'è vera!...
Passa i giorni – Una note, de scondon,
el capo sala el l'à butà par tera
soto un mucio de bale de coton...
Da quela volta no l'è sta più ela,
ma gh'è vegnudo tanto mal al cor,
che l'à ridota come una candela,
come una rama che l'à perso el fior...
Gh'è restado i cavei de carbonela,
ma drento i oci s'à smorsà el slusor....
– Ehi, Carboneta, dunque come éla?
– Ah, la risponde, se el savesse, sior!
. . . . . . . . . . . . . . .
Se sente un sigo! – Oh quanto, quanto mal!
Co un brasso in tochi e col facin stravolto
i à portà Carboneta a l'ospedal....
Maledeta filanda! A passo a passo,
quel'ingranaio che l'onor g'à tolto,
quel'ingranaio el g'à robado un brasso!
- Note