El Re de Cope

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
El Re de Cope
XVIII secolo
Edission e fonte ▼
[p. 33 modifica]
EL RE DE COPE


1Mamalù quarto, ilustre Re de Cope,
     Spassizava in campagna incognitò:
     E gratandose in testa: Oh le xe trope,
     Trope strussie, el diseva; oibò, oibò!
     I ga un bel dir! eh lo sa ben ch'il prova;
     L'è proprio una galia da pope a prova!
2No credo che ghe sia sora la tera
     Un omo contrarià come son mi,
     Mi vòi la pase, e i me fa far la guera;
     No vorìa meter nove imposte... oh sì!
     Le nave in tochi, l'arsenal in pezzi,
     I soldai senza scarpe, e ghe vol bezzi.
3Podessio almanco veder schieta e neta
     La verità; saver come la xe
     Per regolarme! oh giusto! maledeta
     Quela che so! Busìe quante volè.
     E co i sa fato radopiar la paga,
     Son un Tito, un Trajan! e che la vaga.
4El popolo cussì magna i sculieri,
     E a mi la compassion me strazza el cuor;

[p. 34 modifica]

     Chiamo ogni dì a capitolo i pensieri,
     Studio la note come un traditor,
     E col mio scetro in man, per quanto fazzo,
     Resto a dretura un vis... resto un pagiazzo.
5Mentre el pianze la propria e la sventura
     Del bel regno de Cope, Mamalù
     Buta l'ochio sui campi, e la pianura
     El vede sparsa de cinquanta al più,
     Tra bechi magri e piegore scachie,
     Sporche, pelae, che no pol star in pie.
6Core qua e là el pastor, ora drio el beco
     Che drento al bosco se vorìa ficar,
     Ora a tor su un agnelo seco, seco,
     Che xe cascà che no se pol più alzar,
     Mentre, sie passi in drio, drento d'un fosso
     Sta el lovo devorandoghe el più grosso.
7Buta via quelo per socorer questo,
     El sbrissa e casca e perde questo e quelo:
     Un altro lovo ghe spaventa el resto
     E ghe magna el monton coi corni e'l pelo;
     El pastor no ga più gambe, nè fià,
     El se strazza i cavei, l'è desperà.
8Mamalù dise alora: 'L'è curiosa!
     L'è proprio el mio ritrato tal e qual.
     Ai Re donca e ai pastori con una dosa
     Se fa i piati da cogo? no gh'è mal!
     Ma me par che lassù se doveria
     Qualche riguardo mo a la monarchia.

[p. 35 modifica]

9Caminando più avanti el trova l'erba
     Più fresca e bela, più fiorito el pian;
     In riva al fiume el vede una superba
     Lista de grasse piegore in lontan,
     Bianche cussì, che par mentre le beve
     Coverto tuto l'arzere de neve.
10I bechi se strassina el pelo in tera,
     I castrai pesa cento lire l'un,
     Montoni, agnei... se vedessi che ciera!
     I consola a vardarli; un bianco, un brun,
     Ma tuti grassi, in ton; i core, i salta,
     I se monta, i se ingropa, i se rebalta.
11Le piegore no pol portar le tete;
     Quasi tute ga soto el so bebè;
     L'erba fresca odorosa ghe rimete
     El late, e chiuchia pur che za ghe n'è;
     Per farla breve e terminar l'elogio,
     Credèla, o no, le xe vestìe d'orsogio!
12El Pastor che le varda xe Tognoto,
     Che butà là, a l'ombra d'un salgher
     Se sona un ritornèlo col subioto,
     E po canta, stonando dal piaser:
     La mia morosa xe tra le più bele
     La ga do ochi che le par do stele.
13El Re dise, strenzendose in le spale:
     Vedo, come sta scena à da finir!
     Gh'è più lovi che alberi in sta vale;
     Schiao siora mandra! oh me voi divertir!

[p. 36 modifica]

     A salvar quei boconi, bona note!
     Ghe vol altro, compare, che vilote!
14E, per diana, che zonto in quel momento,
     Quasi per far la corte a so maestà,
     Passa el lovo, ma lesto come el vento
     Dà su Melampo, e lo stravaca là.
     Veramente al rumor de la barufa
     Un monton se la sbigna per la fufa.
15Ma, cossa serve? el zerman de Melampo
     Ghe xe adosso, a so logo el fa tornar,
     E tuto torna in regola in t'un lampo.
     Tognoto subia, e seguita a cantar,
     Come se proprio nol ghe dasse un figo
     De tuto quel che va nassendo: Amigo,
16Ghe dise Mamalù, feme un servizio...
     Saveu che gh'è stà el lovo, o nol saveu?
     A dirvela, me par poco giudizio
     Star là cussì; perchè no ve moveu?
     Da la boca levandose el subioto
     Responde in bota a Mamalù, Tognoto:
17Sior, no me movo co so bona grazia,
     Perchè i cani che go li ò scielti mi,
     I è forti, atenti, e poco pan li sazia.
     — Ah! dise el Re de Cope, mo siorsì,
     Ò inteso tuto; finirò i mi afani.
     L'e corso in casa a baratar i cani.
18S'à visto in bota a moderar le spese,
     El fante à storto el muso, el cavalo? uh

[p. 37 modifica]

     Ma tuti à respirà da l'asso al diese.
     Se i altri re imitasse Mamalù,
     I re, za se capimo, amici cari,
     De spade, de bastoni, de danari,
     Nò, un palo solo, no la quarta parte,
     Respirerave el mazzo de le carte.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_Re_de_Cope&oldid=41626"