El Nadal de Roma
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Viva el siòparo | Edission e fonte ▼ | Concistoro → |
.jpg)
Dixique ad eos: non est bona res quam facitis.
Esdr. V, 9.
ME torlo per somaro? Andemo, andemo!
Mi so la storia greca e la romana,
Che, s'el me sfida Salomon medemo,
El pol mètar la gondola in cavana.
Ghe giera dunque i Re Romolo e Remo,
Putei bastardi d'una carampana,
Che de tute le cosse che vedemo
Lori i xe stai l'origine lontana;
Perchè sti Re ga fabricà el Tarpeo
Co tante antichità senza sparagno
Che adesso le xe in tochi int'el Museo.
Lori i gà fato el Campidolgio, el bagno,
La colona Troiana, el Culiseo
E 'l Corso Umberto col cafè de Aragno.
Donca sti Re, che i gièra do fradeli,
Visto che giera fata la cità,
A Canaregio i gà sfodrà i corteli
E Remo povareto, el ghè restà.
Muzio Coclite alora, uno de queli
Che defendeva el ponte... che lu el sa,
Restà lu solo de sti tre fradeli,
Sul fornelo le man se gà brusa,
E Lugrezia romana, povareta!
E Marcantonio e Tito imperatori!
E Oronzio Flaco e Ciceron poeta!
Mi no ghe cito i libri nè i autori,
Ma la storia i pol véder, ostregheta,
Che debòto la sò compagno a lori.
Una cossa però no la capisso:
El Natale de Roma capital.
Ma come? No xe al Santo Crocifisso
Che i ghe fa la novena de Nadal?
Nadal gà nel lunario el zorno fisso.
Vintizinque Decembre e manco mal
Che i ignoranti mi li compatisso
E no ghe sgnàco un fulmine papal!
Caro el Nadal de sta cità inocente
Che sgògna i preti e còcola, pur tropo,
I framasoni che no crede in gnente!
El Nadal! Voleu vedar che ghe piopo
Un non expedit drio, caldo bogiente...
Che lo retiro la matina dopo.