Viva el siòparo
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Lepidus timidus | Edission e fonte ▼ | El Nadal de Roma → |
.jpg)
Egrediemini et salietis sicut vituli de armento.
Malach. IV, 2.
PARON — gò dito al Cardinal Meri —
Cossa diria le ciàcole del mondo
Se me metesse in siòparo anca mi?
Lu el gà fato un inchino assae profondo
E po' el gà dito — «Fresca, Santitad!
Este saràve el dia del finimondo
Y ciertamente toda la ciudad
Levantaria la voz diciendo: mira,
Por San Jago, que hermosa puxonàd!» —
Minenza — gò resposto ― zira, zira
E fai la rota, ma el se meta in mente
Che con mi non se zoga a mola e tira.
Lu no xe diplomatico per gnente,
Ma, senza bisegàr tanti lunari,
Ghe dirò mi quel che dirìa la zente.
Intanto i framasoni, i carbonari,
I giacubini, i stizzi de l'inferno
Ringraziando el Signor, diria magari!
Ma el primo a biastemar saria el Governo
Per via dei Camaroni e dei Cornagia
Neri come marànteghe de inferno.
E po' i frati, le suore e la canagia
Che no serve el Signor ma le buele,
Me diria: Santo Padre, malanàgia!
Perchè se mi la pianto, adio candele,
Adio messe, tesori e Montresori
Che impinisse le panze e le scarsele.
Pane senza lavoro, i dise lori,
E se mi sioperasse da Gerarca,
Cantaria bona sera, miei signori,
E tornarìa a Venezia Patriarca
Senza tanti fastidi e vogaria
In libertà, matina e sera, in barca.
Ah, che gusto, Minenza, scampar via
Da sta galera dove un galantomo
Crepa de rabia e de malinconia!
Qua gò per carzerier el mazordomo
Che gà le guardie e i sbiri al so comando...
Ma che i me crede forse un superomo?
Me gàli tolto per Corado Brando?