El Montebaldo e le montebaldine

by Berto Barbarani

3 El Montebaldo e le montebaldine I due canzonieri I due canzonieri/Libro III - Le montebaldine I due canzonieri/Libro III - Le montebaldine La canson a la primavera Berto Barbarani 1900 XIX Soneti veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro III - Le montebaldine

El Montebaldo e le montebaldine

1900

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

← Libro III - Le montebaldine

Edission e fonte ▼

La canson a la primavera  →

EL MONTEBALDO

E LE MONTEBALDINE.

I.

     Co i piè nel lago e co la testa sconta
fra le nebie che fuma a fiochi, a fiochi,
co una tempesta quasi sempre pronta
par fulminar le barche de i pitochi;

     cargo de gobe, che finisse in ponta,
col fogo drento, che lo magna a tochi...
Quando la rabia nel çervel ghe monta,
tuta brontolamenti e tuta s-ciochi;¹

     e i boschi alti salta su de furia
soto i colpi de vento che li scuria,²
e no gh'è baito che se tegna saldo

     e no gh'è fosso che no para un progno,
una note sveiandome da un sogno,
da la Ferara³ ò visto Monte Baldo!

II.

     «Lago, da l'aqua fresca e celestina
de le fontane che te sbrissia drento,
lago de Garda, da la recia fina,
che te senti tremar le vele al vento

     e i limonari quando che i se inchina
zo da le rive a farte complimento,
l'èto vista scapar quela regina⁴
che i avea impresonado a tradimento?»

     Cosìta a sera, i barcaroi che canta
co' 'na malinconia che no fa pena,
bina⁵ la rede che i aveva spanta⁶

     e i canta i canta su la rede piena,
fin che la dona a casa se descanta⁷
atorno al fogo a pareciar da çena!

III.

     Quando che el lago fa la so cantada,
el Montebaldo par dormir se chieta,
e no gh'è sengia⁸ o àlbara o stradeta
che no se senta l'anima striada.⁹

     E alora svelte ciapa su la strada
propio incontro a Verona che le speta,
le ariete fine che me fa poeta,
lucide e fresche come la rosada;

     parchè i artisti de le cose bele,
quei che ghe roba el verde a la campagna,
quei che ghe strussia¹⁰ i basi a le putele,

     sapia el segreto de ste cose bone
e traverso el çervel de la montagna
veda quadri de versi e de madone!

IV.

     Come che le ne piove da montagna,
col fasso a spale e la pesseta¹¹ in testa,
cantando le vilote¹² de la festa
e el masseto infilà ne la pistagna,¹³

     zo par le sengie, Dio che le compagna,
no gh'è sassi nè bissi che le aresta,
fassa bel tempo o fassa la tempesta,
col sol che s-cioca o l'acqua che le bagna,

     co i seni sgonfi e streti in penitensa
soto le corde, e el Montebaldo griso
dove che sbocia el fior de sta semensa,

     col vento in recia pien de paroline,
col lago in fronte che ghe specia el viso...
Eco che passa, le Montebaldine!¹⁴

---

Note

1. s-ciochi: scoppi
2. che li scuria: che li frusta
3. Da la Ferara: Ferrara di Montebaldo, ridentissimo paesello di montagna, dove i turisti usano per solito pernottare prima di salire alla cima del monte (metri 2200) detta del Telegrafo.
4. l'èto vista scapar quela regina?: Si allude ad Adelaide di Borgogna, fatta prigioniera da Berengario I nella rocca di Garda e di là fuggita e ricoverata a Canossa, con l'aiuto di un frate, secondo la leggenda, mediante l'intervento di Ottone I, secondo la storia
5. bina: raccolgono
6. spanta: sparsa
7. se descanta: si affretta, sollecita.
8. sengia: roccia, rupe
9. striada: stregata
10. quei che ghe strussia: che sciupano.
11. pesseta: fazzoletto
12. vilote: stornelli delle valli veronesi
13. pistagna: risvolto del giubbetto
14. Montebaldine: contadine del Montebaldo. Tanto queste quanto le altre montanine, specie nelle montagne del Trentino, della Vicentina e del Bellunese, usano scendere in città sul finir dell'autunno per cercar di che guadagnarsi da vivere.