Pagina:Berto Barbarani, I due canzonieri, 1917.pdf/80

EL MONTEBALDO

E LE MONTEBALDINE.

I.

     Co i piè nel lago e co la testa sconta
fra le nebie che fuma a fiochi, a fiochi,
co una tempesta quasi sempre pronta
par fulminar le barche de i pitochi;

     cargo de gobe, che finisse in ponta,
col fogo drento, che lo magna a tochi...
Quando la rabia nel çervel ghe monta,
tuta brontolamenti e tuta s-ciochi;¹

     e i boschi alti salta su de furia
soto i colpi de vento che li scuria,²
e no gh'è baito che se tegna saldo

     e no gh'è fosso che no para un progno,
una note sveiandome da un sogno,
da la Ferara³ ò visto Monte Baldo!

1. s-ciochi: scoppi
2. che li scuria: che li frusta
3. Da la Ferara: Ferrara di Montebaldo, ridentissimo paesello di montagna, dove i turisti usano per solito pernottare prima di salire alla cima del monte (metri 2200) detta del Telegrafo.