Pagina:Berto Barbarani, I due canzonieri, 1917.pdf/81

II.

     «Lago, da l'aqua fresca e celestina
de le fontane che te sbrissia drento,
lago de Garda, da la recia fina,
che te senti tremar le vele al vento

     e i limonari quando che i se inchina
zo da le rive a farte complimento,
l'èto vista scapar quela regina¹
che i avea impresonado a tradimento?»

     Cosìta a sera, i barcaroi che canta
co' 'na malinconia che no fa pena,
bina² la rede che i aveva spanta³

     e i canta i canta su la rede piena,
fin che la dona a casa se descanta⁴
atorno al fogo a pareciar da çena!

1. l'èto vista scapar quela regina?: Si allude ad Adelaide di Borgogna, fatta prigioniera da Berengario I nella rocca di Garda e di là fuggita e ricoverata a Canossa, con l'aiuto di un frate, secondo la leggenda, mediante l'intervento di Ottone I, secondo la storia
2. bina: raccolgono
3. spanta: sparsa
4. se descanta: si affretta, sollecita.