Disè, se Dio v'ajuta, Pastorei

by Gian Giacomo Mazzolà

3 XVII I cavei de Nina XVI XVIII Gian Giacomo Mazzolà 1785 XVIII

soneti

Gian Giacomo Mazzolà ―  I cavei de Nina

XVII

1785

Edission original:	Collezione delle migliori opere scritte in dialetto veneziano, Volume quarto: Poesie di Gio. Giacomo Mazzolà e di Lodovico Pastò, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 4.djvu

←  XVI

Edission e fonte ▼

XVIII  →

XVII

Disè, se Dio v'ajuta, Pastorei,
     Per sto bosco sarave mai passada
     La me Nina, el me Ben? Che pena! oimei!
     4No la cato, e sì tanto l'ò cercada!

Sentì... do stele xe i so ochieti bei,
     La ga el visin che'l par riose e zonchiada;
     E una Coa de longhissimi Cavei
     8Biondi e strabiondi al vento sparpagnada,

Se la incontressi mai, sentì, disèghe,
     Che da per tuto vago d'ela in trazza,
     11E che la cerco le zornade intreghe;

Che la chiamo, che pianzo, che imatisso,
     Che no so gnanca più quel che me fazza
     14E che la cora che d'amor sganghisso.