Il bagno
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Pensieri | Edission e fonte ▼ | Dies illa → |
.jpg)
Boccaccio. Fiammetta, Cap. V.
Co' giera calmo el mar, ne la matina
Fresca, che dà le sgrisole a la pele,
Petava le mudande e le pianele
Sora l'erba e 'l sabion de la marina,
E in bragheta modesta e in papalina,
Per riguardo al pudor de le putele,
Intrava in acqua sino a le mamele,
Sgambetando co' fa una balarina.
L'acqua la giera tanto trasparente
Che se vedeva le moléche in fondo
Caminar de traverso alegramente
E mi, senza pensier, fora dal mondo,
Vardava in alto, nel turchin lusente,
Un cocal bianco che volava in tondo.
Voli de vele rosse a tramontana,
Un branco de putèi che salta e crìa,
Un ciacolar de done in compagnia,
Un trepudio de vita e d'aria sana
Me carezzava el cor con una strana
Onda de volutà, de poesia,
Che lodava el Signor per l'alegria,
Unico ben de la famegia umana.
Dopo el garbin che no rispeta gnente,
Sventolando el niziòl che me sugava,
Scoverzeva un spetacolo imponente;
Ma mi godeva el fresco e no badava
Ai comenti del volgo incompetente
E al coro dei putèi che zifolava.
Che mistero xe 'l mar, Santa Madona!
I gà rason ste màcie de franzesi
Che, segondo el parlar de i so paesi,
I ghe dise la mère e i lo fa dona!
Infati el cambia come una persona
Che patissa un desturbo tuti i mesi;
Ancuo de modi amabili e cortesi,
Doman con una rabia buzardona,
Anca el mar de la vita el xe compagno,
Ch'el gà cambià per mi tuto in t'un boto
E gò fato sto strazzo de guadagno!
I me fa ― «Ti gà vinto un terno al loto!
Cossa vustu de più? Te manca el bagno?» —
Cari! Questo xe un bagno e mi el galioto!!