Consulto
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Meditazione | Edission e fonte ▼ | Thesaurus → |
.jpg)
Omne quod mundum est comedite.
Deuter, XIV, 20.
PODAGRA? Ma, dotor, che la me ascolta,
Mi magno poco, che lo sa sti preti,
Mi una tazza de vin la me par molta
E i cibi che i me passa i xe brodeti;
Ma, ciò mi ste panade me revolta,
Posto che al mondo ognun gà i so difeti,
Ghe digo in confession che qualche volta
Me piase un frito de calamareti,
Ma, cossa vorlo mai, qua no i xe boni,
Che solo a Ciòza i li sa far pulito,
Caldi, crocanti, a sugo de limoni.
Solo a Ciòza se magna el pesce frito
De gusto e che fa prò tuti i boconi,
Che, cò se vede el mar vien l'apetito.
El mar! Galo mai visto el mar che giera
Una volta el mio gusto, el mio trasporto,
Anzi che giera el solo mio conforto
Da le secade che gavèva in tera?
Lo galo visto mai de prima sera,
Senza una crespa d'onda ch'el par morto,
Cò le barche da l'alto ariva in porto
E i pescaòri canta a la liziera?
Cò se vede montar l'ombra che tase,
Piena de stele che le par d'arzento
E a poco a poco iluminar le case?
Ah, no ghe giera gnanca un fil de vento
Cò nel silenzio de l'imensa pase
Nassèa la luna e mi giera contento!
Podagra? Caro lu la malatia
No la xe la podagra, al so servizio.
Tuto quanto el mio mal sta nel suplizio
Vero che xe sta falsa presonia.
La diga in verità, vorlo che sia
Robusto, in gamba e senza pregiudizio
Un povar'omo che no fa esercizio,
Sarà come un capon dentro la stia?
Ghe staràvelo lu, san e contento,
Qua in sta Corte de guardie e de sospeti
Che guai, Madona, se ghe intrasse el vento?
Qua, in mezzo a ste petegole de preti,
Che i me comanda e i me conzede a stento
Sto frito straco de calamareti?