Bisogna salvar l'apparenza

by Luigi Martignon

3 Bisogna salvar l'apparenza Raccolta poesie veneziane dell'autore dei Capricci poetici nello stesso dialetto stampati nel 1819 Raccolta poesie veneziane dell'autore dei Capricci poetici nello stesso dialetto stampati nel 1819/Parte seconda Protesta El conte Redestola Luigi Martignon 1826 XIX Poesie

Indice:Raccolta poesie veneziane dell'autore dei Capricci poetici nello stesso dialetto 2.djvu

Luigi Martignon ―  Raccolta poesie veneziane dell'autore dei Capricci poetici nello stesso dialetto stampati nel 1819  ― Parte seconda

Bisogna salvar l'apparenza

1826

Edission original:	Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826
Fonte:	Indice:Raccolta poesie veneziane dell'autore dei Capricci poetici nello stesso dialetto 2.djvu

←  Protesta

Edission e fonte ▼

El conte Redestola  →

Bisogna salvar l'apparenza

In un mio manoscrito,
     Che alle tarme d'un secolo, e anca più
     Ha cavà l'apetito,
     Più de trenta sentenze ho tolte su,
     E massime morali,
     E cosse con dei sali;
     In fra le tante una me n'ho notada,
     Che in seguito mai più me l'ho scordada,
     Disea, me par la mare de Pipin
     Re Goto, allora molto picinin,
     » Mio fio, se mai la sorte

     » Te spenzesse dall'alto in basso stato,
     » Recordete da forte
     » Sostien de quella ogni bestial maltrato,
     » Mostra rassegnazion, mostra pazienza,
     » Ma sora tutto salva l'apparenza.
     E de questo a proposito ecco qua,
     Cossa la ga contà,
     Per impizzarghe forse un cezendelo
     Nel principesco gotico cervello.

     A Venezia quando in voga
          Negoziante Pantalon,
          Rispettà fin dalla toga
          Gera a tutti in opinion.
     
     D'un mercante allora gera
          Tanto sacra la parola,
          Che i zecchini a miera a miera
          Se gavea su quella sola.
     
     Negozietto in Ruga giuffa
          Gavea un certo peruchetta,
          Omo probo, e senza muffà,
          Cege folte, e gran baretta.

     Mai sortio dalla so sfera
          Sempre onesto in piazza, e in Borsa, ¹
          Chi savesse no ghe gera
          De lu un danno, o una risorsa.
     
     De brillanti un rico anello.
          Fatto a forma de botton,
          Lu portava, e molto bello,
          Chiamà allora rosetton.
     
     Dava forza al so concetto,
          E a suporlo un gran signor,
          Quel vestiario assae ristretto,
          E sto lustro de valor.
     
     El commercio ha cambià fazza,
          L'è andà un poco in desossè,
          Ma lu saldi in Borsa, e in piazza
          Co quel lustro che intendè.
     
     Della casa un fià alla volta
          S'ha vendudo el megio el bon,
          Ma bisogni lu no scolta,
          Forte in deo xe el rosetton.

     Tal che molti dal sospetto
          Recedendo dei so guai,
          Ga acquistà maggior concetto,
          E affidà più capitai.

     Morto alfin, s'ha cognossudo
          Del mercante el stato vero
          Tutti quanti ha za savudo,
          Che l'avea manco del zero.

     Ma per altro a far profonda
          In quei tempi un'opinion,
          Ha bastà peruca tonda,
          Sagio grezzo, e un rosetton.

     Cussì i zorni ha ben condotti
          Quel mercante venezian,
          Che fra el numero dei rotti
          Avea un stato, e tutto in man.

Sta noveletta la m'ha piasso tanto,
     Perchè santa una massima la gà,
     Ma adesso stabilio xe un altro impianto,
     Ghe xe viste diverse in società;

     Ghe la semenza dei brillanti ancora,
     Qualche deo contornà salta anca fora,
     Ma, o no xeli più dei de quella volta,
     Oppur parole sute, no se ascolta,
     I brillanti, se i varda, e se li stima,
     Ma per dar soldi se vol pegno in prima.

---

Note

1. Pubblico ridotto dei Mercanti.