Bellis perennis (Linn.)
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Ancora l'onomastico | Edission e fonte ▼ | Vere novo → |
.jpg)
Haec est legenda aut historia Papae.
Mart. Luther. Comm. in Dan.
SALO gnanca, paron, che stamatina
Finalmente in zardin tirava el fià.
Co' gò scoverto una malgaritina
Bianca, tra l'erba nova, in mezzo al prà?
El vento che vegnìa da la marina
Me portava el romor de la cità
E nell'aria purissima e turchina
Passava un sofio de fecondità.
Alora gò sentio drento del cor
Un'onda de bontà, de poesia,
Un infinito spasemo d'amor.
E una gran volontà de scampar via
Per benedir la primavera, el fior,
El Re, Montecitorio e Porta Pia.
Malgaritina da le fogie smorte,
Se mai te camparà fino a doman,
Sàstu gnente el mister de la mia sorte?
Sàstu se scamparò dal Vatican?
Vedarò un zorno, fora de ste porte,
I papàvari rossi in mezzo al gran,
L'ombra dei boschi e, prima de la morte,
La mia Venezia, el Tombolo e Salzan?
Malgaritina, dime una parola
De pase, de perdon, de carità;
Fame un segno d'amor che me consola
Perchè qua. in mezo a tante falsità,
Me torna el dubio come un zorno a scola...
Morirògio cristian? Nessun lo sa!!
E cussì, rumegando a la sordina,
Per un moto del cor me son sentà
Con la còtola bianca in mezo al prà
A carezzar quela malgaritina.
— Dio te salvi dal vento e da la brina,
Povaro fior! Ma come sestu qua?
No gàstu fredo ne l'umidità
De sta falsa preson che me sassina? —
Digo e me vien un monsignor mincion
Che me barbòta: ―― «La se varda drio,
Ch'el se sporca le còtole, paron!» —
Giusto come a un putelo! Ma un par mio
Mortificarlo co ste corezion!...
Mo cossa vorli? Che rinega Idio?