Vere novo
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Bellis perennis (Linn.) | Edission e fonte ▼ | Tra un ricevimento e l'altro → |
.jpg)
Fulcite me floribus, stipate me malis, quia amore langueo.
Cant. Cantic. II, 5.
IERI, qua drento, gò sentio ’na ’ose
Che gà dito: ― «Ciò, Bepi, bona sera;
No te cognossi più la primavera?
Son mi che averzo i bòcoli a le riose,
Son mi che fa vegnir l'erbe odorose
E che scalda nel sol l'aria liziera,
Mi che covèrzo d'ombra el nio che spera,
Che porto fiori al prà, basi a le spose.
Varda le prime ròndene che svola,
Ascolta el primo rossignòl che canta
E nasa el primo fior de la viola!
No ti ricordi più, Bepi, con quanta
Anema de passion ne la parola,
Ti me disevi: primavera santa?»
«Oh ― gò resposto ― primavera santa,
Giera quel tempo che mi andava a scola
Col barònzolo fora, in camisiola...
Se me recordo!? Giera del quaranta,
Ch'el pettirosso in alto de una pianta,
Mato d'amor, cantava a tuta gola,
L'erba la gera verda e l'aria mola
E 'l ciel smaltà de quel turchin che incanta.
E ancuo che me son fato a la ringhiera,
Gò vardà ste campagne dolorose
Per vèdar qualche fior... ma no ghe n'era
E, su le imense pratarie nebiose,
De sta mia trista vita imagin vera,
Spuntava da lontan negra una crose!»