Arringa sul Decreto di Abolizione de' Frati/06
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← V | Edission e fonte ▼ | VII → |
In t’un secolo tanto depravà
(Pur tropo ghe n’avemo l’esperienza
3Da dove el nostro mal xe derivà!)
Una moderna e libertina scienza,
Insidiosa molto a la Religion,
6Xe causa de sta trista conseguenza!
Questa à portà la gran revoluzion
Nei cuori umani, e da qua aponto è nato
9Che in libertà s’à messo le passion.
Questa à spossà le Legi e ’l Prencipato,
E ga oscurà quel astro tutelar,
12Scorta sicura a la Rason de Stato;
A l’interesse alfin particolar
L’à possudo nel cuor dei Citadini
15Quel ch’è publico ben sacrificar.
Da qua vien che i lontani e che i vicini
No ga più verso nu quela riserva
18Che li tegneva drento i so confini.
Ogni dì più s’indebolisse e snerva
El Patrimonio publico; e l’Erario
21Apena in la opinion el se conserva;
E gh’è sta bagatela de divario
Da quelo che nu gerimo, e che semo
24Per un pensar sì stravagante e vario,
Che quando de sto passo seguitemo
Ancora per un poco, go paura...
27Solo a pensarghe inoridisso e tremo!
A sta lugubre e tragica pitura,
Che no xe idea de fantasia scaldada
30Da insolita comossa interna cura,
La Sapienza dei Savj, iluminada
Dal spirito divin d’un Consultor,1
33(Ch’el sa savudo per segreta strada)
Che se sa mantegnir l’aura e ’l favor
Anca adesso, siben de qua lontan,
36De più d’un so Patron e Protetor;
E getada da quel vento Furlan,
Che l’à in sto Segretario e Computista
39Tanto supià ch’el ga menà la man,
I siori Savj, replico, a la vista
D’una situazion sì dolorosa
42Che ogni bon Citadin move e ratrista,
Tra le Consulte i à pensà una cosa
Che sarà de gran massimo provento,
45Non men che a la Republica gloriosa.
Prima però de dar l’ecitamento
A la Parte importante, a sto miracolo
48I à previsto col so antivedimento,
Che bisognava consultar l’oracolo
De la Sovranità sora de tuto,
51Per poder tior de mezo quel ostacolo
Che s’oponeva a conseguir el fruto
De le machinazion e dei raziri
54Dei quai no gh’è chi dir se possa istruto.
Pur senza frase e senza tanti ziri
Mi ghe dirò (le prego, le me ascolti)
57Dove sto afar el tenda e dove el miri.
Come i vedeva i ordini sconvolti
Per loro colpa da l’economia,
60E sempre più i bisogni e grandi e molti,
I à medità ne la so fantasìa
De bisegar de niovo in le Man-morte
63Per poder despogiar la Fraterìa;
E dubitando che vegnindo estorte
A forza le sostanze de le Chiese
66Regolari, per vie indirete e storte
I podeva incontrar de le contese,
E che in quel Decreto specialmente2
69I gera afato spogi de difese;
I à tanto strologà, che finalmente
Con un tacon assae pezo del sbrego,
72Cosa ai fato? Le me staga atente,
E le la sentirà bela! Le prego.
- Note a cura de Bartolommeo Gamba