Udienza privata
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Tra un ricevimento e l'altro | Edission e fonte ▼ | Andando a letto → |
.jpg)
E l'un l'altro abbracciava.
Dante, Purg., VI, 75.
COME? El xe Tito Livio! Oh che bel caso,
Che ghe piopo la mia benedission!
M'intervistelo mai per el Travaso?
Quel fogio xe la mia consolazion!
E Mascarin? Che la me manda el busto,
Che in camera da studio el va benon.
El mestier? Bravo! La me toca giusto
Proprio, preciso el tasto che me dol,
Dove che un fià de sfogo el me fa gusto!
Vedelo? Un scoazzer, un barcariol
E (scusa, salo!) anca una carampana,
Quando i xe in casa, i fa quelo che i vol;
Ma mi, de Dia! tuta la setimana
Me sento a pope, a prova, avanti e drio,
La nostra Santa Inquisizion Romana!
Tuti i momenti i me ricorda Dio,
L'obolo, l'eticheta, el Temporal,
Che debòto debòto i m'ha intontio.
Tuto contro de mi! Tuto va mal!
La Franza che me rompe i concordai
E che buta le muneghe in canal!
Tuto in malora e tuti i xe inrabiai.
E don Muri che fa el conferenzier
E Paganuzi e Gròsoli nei guai!
Vedela quà che razza de mestier
Che tuti i me tormenta e i m'avelena,
Perfin i preti che i vol tor muger!
Oh, paron Tito Livio! Una serena
Note de primavera in Canal Grando,
Soto l'arzento de la luna piena!
Oh, Tito Livio! Una matina, quando
L'acqua che parla come una morosa
Al gondolier che spessega remando!
Oh, una sera tranquilla e luminosa
Quando el sol ga lassà sora Malghera
Come una strissa de color de riosa!
Dove xela per mi la primavera?
Dove xela la pase benedeta?
Dove xela una fazza un po' sincera?
Qualche volta me vien la lagrimeta
Proprio dal cor, che me la sugo via
E molo tuto al più qualche ostregheta.
Xe volontà de Cristo e così sia,
Ma la xe ancora volontà de frati!...
Basta! Ringrassio de la cortesia
E el me saluda Oronzio Marginati.