Amor, Nina, me stuzzega (1817)

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
[p. 80 modifica]
II. CANZONETTA


Amor, Nina, me stuzzega
     Perchè continua a amarte,
     Ma el to' contegno, o barbara,
     4Me stimola a lassarte.
El to viseto amabile
     Per mi xe una magia,
     Ma quel to' cuor volubile
     8Xe pien de tirania.
Incanta el to gran spirito,
     Le paroline e i vezzi,
     Ma chi pol mai resister
     12Ai tanti to' disprezzi?
Per tì d'amor zavario,
     Ma senza compassion
     Tì tuto a l'incontrario
     16De mì ti fa sbolzon.
Ti fa de mi un redicolo
     Che tropo xe indiscreto,
     Epur senza dolermene
     20Sofrirlo me assogeto.
Me bastarìa sensibile
     Trovarte al mio dolor,
     Ma co tut'altri prodiga,
     24Che a mi, ti xe d'amor.

[p. 81 modifica]

A Nane, a Checo, a Momolo
     Ti fa tanto de ciera,
     E mì, più che te cocolo,
     28Più ti me trati altiera.
No gaverò quei meriti
     Che ga fursi sti siori,
     Ma in sen go un cuor che spasema
     32Per tì più assae de lori.
Ghe cedo anca in politica,
     Che l'adular detesto,
     Ma in fedeltà li supero,
     36Ch'è più de tuto el resto.
E se no son un zovene
     De quei de primo pelo,
     No so po' gnanca un vechio
     40Da farghene bordelo.
Vedi chi donca merita
     Da tì la preferenza,
     Se quei che xe più zoveni,
     44O quel che à più prudenza.
Ah, Nina mia, rissolvite,
     No farme più penar,
     E no ridurme al merito
     48D'averte da lassar.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Amor,_Nina,_me_stuzzega_(1817)&oldid=69015"