A un comitato eletoral
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← El zerbinoto | Edission e fonte ▼ | La cremazion → |
Basta che se presenta un forestier
Con peto sgionfo e quatro dei de cresta,
Che 'l destira lasagne a so piacer
Secondo la farina che l'à in testa,
Siorsì che i me lo cata col feral
Per farlo consegier municipal.
E mi, corpo de bio, che son qua nato,
Che per ogni canton go pozzi d'oro,
Che pago le mie tasse al Magistrato,
Mi, che a nissun no go da darghe un boro,
Che me fazzo tirar da sie cavai,
No me se mete ne la lista mai?
Mo credeu che no sapia ciaciarar,
O che no gabia forza de polmon?
Deme una tromba e ve farò scampar:
Lassè che parla e vedarè chi son.
Feve avanti, bufoni, e so sicuro
De sequestarve un dopo l'altro al muro.
De cossa po se trata, in conclusion?
De tamisar l’arenda comunal?
Far, desfar un casoto, un fontanon,
O trapiantar qua e là qualche feral?
D’assegnar la pension a l’impiegato
Che magna come un lovo e spua nel piato?
Capirè ben che per sta gran facenda
No ve ocore una cima d’omenon;
Ma un tal che circum circa se n’intenda
De scaldar o sfredir el caregon:
De quei che dorme o che se leva in più
Mi ve ne trovo quanti ne volè.
A le curte: savè dove che stago,
E che a vignir fin là no xe lontan;
Se mai ghe fusse qualche spesa, pago;
Pago e ve zonzerò la bonaman:
No steve indubitar.... me buto fora...
(Gnoco1 se no me refo in magnaora).
- Note
- ↑ Baccellone.