La cremazion
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← A un comitato eletoral | Edission e fonte ▼ | El sospiro de Tomaso Canela → |
Co un pover’omo à fato la valise,
Nissun se move per andarghe drio;
Se tira fora un par de calze sbrise,
El capoto più vecio e descusio:
Una bona rasada a la massela,
E se 'l ga barba, sparagnè anca quela.
Esponendolo come un pesse can
Tra le smorfie e i bordei d’ogni genia,
Aspetemo che vegna el capelan
Co i so martufi a sbarazzarlo via;
Tre giozze d’aqua santa, una preghiera,
E a rivèderse, o caro, soto tera.
Xe vero che se crepa un bravo ometo,
O un toco de lustrissimo sfondà,
Semo qua pronti a farghe 'l so bagneto,
A imbalsemarlo come un papagà:
Ma po Dio sa che razza de birbanti
Messi in conserva xe passai per santi!
Preferisso piutosto la maniera
Ch’à imaginà quel tomo de Segato,
De convertir la carne in tanta piera
Per farghe un monumento al Magistrato,
O sia 'na colombera colossal
Per l'inclito Consegio Comunal.
Ma la perla de tutte le invenzion
Xe quela che ve mete in un bel forno
A brustolarve megio d'un capon,
Senza che in fogo vada perso un corno;
E co la magra spesa d'un fiorin
Carlo Magno deventa spolverin.
Col fumo che se leva da i rognoni
E da tuto quel lardo descolà,
Andaremo per aria co i baloni,
Tuta ilumineremo la cità.
Fazza i pianeti siopero co i vol:
Venda el so caro e i so pulieri1 el sol!
Saludaremo in ogni lampadario
Parenti e amici che xe andai con Dio;
In ogni cana sbusa un impresario,
In ogni beco l'ombra d'un mario:
E ne la sacra usina de Sant’Ana2
El Panteòn de la carogna umana!
- Note