A sior Piero Pain, nel zorno del so natalizio (Brindisi-scherzo)
|
1902
|
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← A sior Toni Regazzi, avendome invidà a magnar le fritole (Brindisi) | Edission e fonte ▼ | Al Dotor A. Garioni, per la nassita de mia fia Maria, in segno de riconossenza → |
Per dirla s-cieta,
dirla sul serio,
qua sta famegia
no ga criterio:
perchè se un zorno
vu siè invidai,
ve alzè da tola
più che afamai.
Qua sti paroní
no ga creanza;
i se impegnisse
lori la panza,
e po i v'a dirghe
a tuti quanti,
fra çento mile
spasimi e pianti,
che per nualtri,
mezi afamai,
i xe ridoti
fin desparai.
Che sia de zorno,
opur de sera,
no i ve riceve
co un fia' de çiera;
i ve destina
un posto a tola
senza mai dirve
meza parola,
e po i ve mete
davanti un piato
dove che forse
magnà ga 'l gato;
i ve presenta
una possada
che forse in gàtolo
xe sta trovada,
un brodo, caspita,
che col sguazzeto
senza alcun dubio
pol star a peto,
la carne vecia
che ga çent'ani,
che apena apena
la magna i cani,
i tovagioli
che forse a caso
i ga pulio
perfin el naso
e la tovagia
che ga servìo
forse a netarse
anca el dadrio;
e co xe in fondo
de sto disnar,
forse i vol anca
farve pagar.
Mi ve assicuro
che co sti modi,
se pol ciamarla
zente da ciodi!
Digo! per altro
mí no so quelo
che a tuti fassa
el critichelo,
e za che zemo,
qua per sior Piero,
esser mi vogio
co lu sincero.
No vogio, caspita,
mi per sicuro
che lu me tegna
el muso duro
e la mia critica
finisso in boto
alzando el sbròdego
che go nel goto
e invido tuti
a dir co mi:
«Viva sior Piero!»
e far cussì...
Venezia 29 giugno 1902.