Al Dotor A. Garioni, per la nassita de mia fia Maria, in segno de riconossenza
1902
|
Edission original: |
Carlo Rumor, Chi le conta xe qua, Venezia, Scarabellin, 1904 |
Fonte: |
Indice:Rumor - Chi le conta xe qua, Venezia, Scarabellin, 1904.pdf |
← A sior Piero Pain, nel zorno del so natalizio (Brindisi-scherzo) | Edission e fonte ▼ | Lettera al mio amico Luigi Bianchi, sconsigliandolo di recarci insieme a teatro → |
La bela
putela
ghe dixe a la cuna:
» Mi go la fortuna
de starte viçin;
de trina
più fina,
perfin ricamada,
ti xe preparada
a posta per mi.
La zente
no sente
le nostre parole,
nualtre do sole
podemo parlar:
afeto
segreto,
cuneta mia bela,
a ti sta putela
ga za dedicà.»
― Elogio
no vogio ―
risponde la cuna
― no dirme nissuna
parola d'amor;
e quando
puzando
su mi la testina
o cara bambina,
ti vien a dormir,
me sento
qua drento
del cuor 'na tortura,
che çerto no dura
l'afeto per mi.
Quel zorno
che atorno
da ti so cavada,
perchè deventada
più granda ti xe,
to mama,
che brama
de farte la dona
più brava, più bona
che dir no se pol,
te insegna
che degna
ti xe de sto mondo
se afeto profondo
ti porti al Dotor.
La bela
putela,
serando i ocieti,
ascolta sti deti
e torna a dormir.
Venezia 22 dicembre 1902.