A la Musica in Piazza
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Dal Barbier | Edission e fonte ▼ | Su la tomba dei fradei Bandiera → |
A l'amigo Anzolo Zoni.
L'altra sera vedo in Piazza
'Na regazza
Che me struca l'ocetin;
La gaveva la scarpeta
De vacheta,
E sul peto un mazzetin.
Come un fior bela la gera,
Ma de sera
No se pol distinguer ben;
Fato stà che sta putela,
Bruta o bela,
Propio arente la me vien;
E voltandome la testa:
― «No xe questa,
Vero, el diga, la Manon?»
― «Siora si, l'ato secondo,
(Ghe rispondo),
Quando lu 'l va in-t'el Salon... »
― «Chi?» ― «El tenor» ― «A, gò capio»
― «(Tu che a Dio...)
«Questo xelo el Trovator?»
― «No. (O bel'alma inamorata...)»
― «La Traviata?»
― «La Luçia de Lamemor».
«Ah, co musica!» ― «Co bela!
Mi, so, re, la,
Si, fa, fa, re, sol, so', fa... »
― «Ah, lu el sona, zovenoto?»
― «Si, el fagoto...»
― «Quelo longo?» ― «Quelo là».
― (Ben ciò, senti, bel moreto,
Un dueto
Vustu dopo far co mi?»
― «Me conossistu?» ― «Mi credo...
Xestu Alfredo?
Si, canagia, ti xe ti!
Xe tre zorni ciò che peno...»
― «Ma, da seno?»
― «Te lo giuro sul mio onor!
― «(Ahi, ghe semo)!» ― «Te amo tanto!»
― «Dime, e quanto? »
― «Diese franchi)...» ― «Oh caro amor!