A Giannino Antona-Traversi
|
Edission original: |
Attilio Sarfatti, Le Rime Veneziane e Il Minuetto, Milano, Fratelli Treves Editori, 1892 |
|
Fonte: |
| ← IX. Eco qua la mia morosa | Edission e fonte ▼ | XI. Desiderio → |
A GIANNINO ANTONA-TRAVERSI
Oh povareto el povaro de spirito
Che inzingar se lassa dale femene,
Pronte a zirarlo come scuria un trótolo,
Oh povareto l'omo che se incótega
Stupidamente drento de una cótola,
6Oh povareto l'omo che fa l'aseno!
Aseno resta, Nino, chi se imbóvola
Ne l'onda de l'amor piena de triboli,
Aseno resta, Nino, chi se snánara
Nel lago traditor pien de pericoli,
Aseno resta, Nino, chi va al pascolo
12Nel prà d'amor e no lo lassa subito.
Nino, là nela mia laguna plaçida,
Drio le isolete saludae de l'ultimo
Baso del sol che in mar se perde splendido,
Gh'è un tenebroso gorgo, un gorgo oribile,
Teror dei gondolieri, antro de vitime,
18Serpente d'aqua che dà morte ai deboli
Nino, quel gorgo tenebroso, credilo,
Al gorgo de l'amor xe in tuto simile,
I forti barcarioi de l'onda pratiçi
Se tien lontani, e in aque calme nàvega.
Megio, megio imitarli, o Nino, e liberi
24Senza afani inveciar e senza palpiti.