Eco qua la mia morosa

by Attilio Sarfatti

3 IX. Eco qua la mia morosa Rime veneziane Libro Quarto VIII. Una promessa X. A Giannino Antona-Traversi Attilio Sarfatti 1892 XIX

poesie

Attilio Sarfatti ―  Rime veneziane  ―  Libro Quarto

IX. Eco qua la mia morosa

1892

Edission original:	Attilio Sarfatti, Le Rime Veneziane e Il Minuetto, Milano, Fratelli Treves Editori, 1892
Fonte:	Indice:Le Rime Veneziane e Il Minuetto.djvu

←  VIII. Una promessa

Edission e fonte ▼

X. A Giannino Antona-Traversi  →

IX.

ECO QUA LA MIA MOROSA

Cavei scuri, bela boca,
Oci neri, carne rosa,
Che nissuno me la toca,
4Eco qua la mia morosa.

Quante volte co la vedo
Me vien mal dal tropo bene,
Quante volte sento e credo
8De morirghe sora al sen!

Do diamanti neri i oci
Xe, lo zuro, de sta tosa,
Zo el capelo, zo i zenoci,
12Eco qua la mia morosa.

Co la vardo tremo tuto,
Quel che sento dir non so,
Paro un sempio, paro un muto,
16Che non dà nè in sì nè in no.

Ma vardèla, ma vardèla,
Che figura deliziosa.
Cossa? in tera gh'è una stela?
20Lo so ben, la mia morosa.

Co ghe parlo sento in pèto
Bater forte, forte el cuor.
El me bala el minueto,
24El me dise: eco el to amor.