Volta la carta

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto. No xe stà indicà l'edission cartacea da cui vien el testo.
Volta la carta
(altri titoli:
Le campane de Sanbruson
Le campane de Dosson
Le campane de San Simon)
Edission e fonte ▼

Versiòn 1 (San Zenone)[canbia]

Trascritta da Imelda A. Pellizzari (n. Alberton) da una filastrocca della tradizione popolare

Din Den Don!
Ƚe campane de San Zenon
Ƚe sonava tanto forte
Che ƚe trava giù ƚe porte
E le porte ƚe jera de ferro
Volta la carta e ghe xe un cappello
El cappello el xe pien de piova
Volta la carta ghe xe na rosa
E la rosa sa da bon
Volta la carta ghe xe un mellon
El mellon xe molto fatto
Volta la carta ghe xe un matto
Un matto da legare
Volta la carta ghe xe el mare
El mare e la marina
Volta la carta ghe xe na gallina
La gallina fa cocodech
Volta la carta ghe xe el bech
El bech fa el massaro
Volta la carta ghe xe un peraro
Un peraro pien de perri
Volta la carta ghe xe i birri
I birri ghe xe tutti
Volta la carta ghe xe do putti
I do putti che duga a balla
Volta la carta ghe xe na cavala
La cavala tra el cao
Volta la carta ghe xe el mamao
El mamao gha el cul rosso
Volta la carta ghe xe un posso
El posso xe pien de acqua
Volta la carta ghe xe una gatta
La gatta con i gattei
Volta la carta ghe xe do puttei
I do puttei che fa ostaria
Volta la carta e la xe fenia!

Versiòn 2[canbia]

Din dan don le canpane de Sanbruson
E le sona dì e note
E le buta zò le porte
Ma le porte gera de féro
Volta la carta ghe xé un caliéro
Un calièro pien de piova
Volta la carta ghe xe na rosa
E la rosa sa da bon
Volta la carta ghe xe un melon
Ma il melon xe massa fato
Volta la carta ghe xe un mato
Un mato da ligare
Volta la carta ghe xe un mare
Un mare e na marina
Volta la carta ghe xé na galina
La galina fa cocodè
Volta la carta ghe xé un re
Un re e un rearo
Volta la carta ghe xé un peraro
Un peraro che fa i fighi
Volta la carta ghe xé i strighi
I strighi che fa miao
Volta la carta ghe xé el babao
Un babao col bèco rosso
Volta la carta ghe xé un posso
Un posso pien de aqua
Volta la carta ghe xe na gata
E la gata fa i gatèi
Volta la carta ghe i putèi
E i putéi fa ostaria
Volta la carta che la xe finia

Versiòn 3 (Treviso)[canbia]

Din Den Don
le campàne de Dosson
che le sona tanto forte
da butàre zò le porte
e le porte xe de fero.
Volta la carta ghe xe un capèlo,
el capèlo pièn de piòva.
Volta la carta ghe xe ‘na rosa,
e la rosa sa da bon.
Volta la carta ghe xe un melòn,
el melòn xe massa fato.
Volta la carta ghe xe un mato,
el mato liga tuti.
Volta la carta ghe xe un mussèto,
el musseto de la Maria,
Volta la carta che la xe finia.


Variante del nord della Provincia:

Din Don Dan
'e campàne de Milàn
che 'e sonava tanto forte
che 'e butava zò le porte
le porte xera de fero
Volta la carta ghe xera un capèlo
el capèlo xera pien de brosa
Volta la carte ghe xera 'a rosa
'a rosa 'a savea da bon
Volta la carta ghe xera un pon
el pon xera massa fato
Volta la carta ghe xera un mato
el mato xoghéa a bàea
Volta la carta ghe xera 'a farfàea
'a farfàea xolava sui fiori
Volta la carta ghe xera i signori
i signori i 'ndéa a brasseto
Volta la carta ghe xera un galeto
el galeto el fea: chicchirichi!

Versiòn 4 (Verona)[canbia]

Din don campanon,
le campane de San Simon
le sonava tanto forte
le butava zò le porte,
le butava zò el portòn,
bim bum bom!

Versiòn 5 (Vicensa)[canbia]

Din, den, don
Le canpàne da Marón
Le sonea tanto forte
Da butàr do le porte
Ma le porte le era de fèr
Volta la carta che l'è un capel
Un capèl pien de piova
Volta la carta che l'è 'na rosa
'Na rosa che sa da bón
Volta la carta che l'è un melón
Un melón l'è massa fat
Volta la carta che l'è un mat
Un mat da ligare
Volta la carta che l'è un pare
Un pare che à dó putèi
Volta la carta che l'è dó gemèi
Dó gemèi che fa ostarìa
Volta la carta che l'è finìa.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Volta_la_carta&oldid=60189"