Versi ditirambici per Nozze

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
Versi ditirambici per Nozze
XIX secolo
Edission e fonte ▼
[p. 94 modifica]
PER NOZZE.


VERSI DITIRAMBICI.


Permetele, Signori,
     Che un so bon servitor
     Se fazza un passo avanti
     Per riverirle tuti, tutiquanti?..
5Oh, cazza, che bel cipro!
     No falo proprio vogia?..
     Graziete, Paroncina;
     Che amabile sposina!
Varda, che bei putini!
     10Dè qua do gotesini,
     Chè i beva povereti.
     Mo cari sti cosseti!..
Come, percossa nò?
     Percossa oibò, oibò?
     15La scusa, mia Signora,
     La 'l creda, siora Dora.
     Questo no ghe fa mal.
El xe un vermifico,
     El xe un febrifugo,
     20El li fortifica,
     El li vivifica,
     El li consola,
     El fa che i svola.
     Chi vol un bel putelo,

[p. 95 modifica]

     25Lo tegna sempre arente al caratelo.
     Mia Mare, povereta,
     Invece dela teta,
     Me dava del bon vin,
     E ben che fato vecchio,
     30Quando me vardo in spechio,
     Me trovo ancora, ancora fantolin.
Oh, bravo el mio Matio!
     Sieu tanto benedio!.,.
     Cospeto, mo cospeto!
     35Questo xe picolite del perfeto...
Cossa vorle, per pietà!...
     Ah, le vol che fazza un prindese:
     Xe ben giusto, sì, son qua,
     E ghe 'l fazzo cordialissimo.
40Viva i mi Alessi amabili
     Con tuti i so parenti,
     E 'l Ciel sempre benefico
     Li colmi de contenti,
     E inoltre ai Sposi fervidi
     45Francesco, e Marianeta
     Ghe dona un pèr de bamboli,
     Che i genitori aleta;
     E a quanti ghè in sto circolo,
     E che me ascolta adesso,
     50Ghe daga el Ciel propicio
     Quel, che voria mi stesso.
     Olà, siori, cossa fèu?
     Dove andèu?...

[p. 96 modifica]

     A Galiera?
     55Se a momenti semo a sera!
     Vegnerò; ma, adesso in bota?...
     Non son minga una marmota;
     Perdoneme, resto qua,
     Fin che ghè sta rarità...
     60Vegno, vegno, fè tacar,
     Me faressi tarocar.
     Ma, se resta sta botiglia,
     Qualcheduno se la piglia...
     Oh la porto via con mi...
     65Son qua, sì, son qua, son qua,
     La gran pressa, che le ga.
Cospetazzo! che cavai!
     Xeli gnanca beverai!
     Alon, alon, alon...
     70Trotrò, trotrò, trotrò;
     Ma la gran sè, fradei,
     Xe quela, che mi gò;
     Bevo, se permetè...
     Via, via, tasè, tasè,
     75Chè l'ò svodada;
     Vardè, che gran cazzada,
     Una botiglia al fin cossa po' xela?
     La tien al più 'na squela...
     Oh, cospetton, vardè, semo a Galiera,
     80Via, puti, desmontè, a tera, a tera.
Varda, varda che palazzo!
     Che zardin stupendonazzo!

[p. 97 modifica]

     Che viali! che stradoni!
     Che spaliere! ch'albaroni!
     85Mo che agrumi! che cedrere...
     Tasè là, no vòi peschiere...
     Siori nò gnanca fontane,
     Che le staga pur lontane...
     No voi aqua, pofardio!
     90La me fa cascar in drio!
Sì, solamente a vederla,
     Ve zuro, me vien mal;
     Sia pur benedetissimo
     El sugo del bocal!
     95Co go del vin in stomego
     Son forte come un diavolo,
     Un omo el più teribile
     Me par alora un piavolo.
Ma se mi mai cascasse
     100Per caso in qualche fosso,
     O che qualcun me trasse
     Un goto d'acqua adosso,
Perdo cussì el cervelo,
     Resto cussì copà,
     105Chè tremo d'un putelo
     Apena deslatà.
Graziete, Sior Chechin.
     Chi mai v'à dà sto vin?..
     Cospeto, che vinon!
     110Lo trovo molto bon,
     Lo trovo molto suto:

[p. 98 modifica]

     Vu za mel permetè ch'el beva tuto?...
     Eco, che l'ò fenio...
     Ma, odio! odio! odio!
     115Odio, che me vien mal!
     Ma-mal-ma-mal-ma-mal...
Sposina amabile,
     Mo che vertigini!
     Che mal de stomego!
     120Vardè, se tremolo,
     Se tuto bagolo...
     Qual xe l'origine,
     Su via, disemelo,
     Dei mali perfidi,
     125Che cuor, e vissere
     Cussì me lacera?
     Vel dirò mi,
     Sentì, sentì.
Questa xe l'aria
     130Piena d'umori
     D'aquei vapori,
     Che ò respirà.
Quante peschiere,
     Quante fontane,
     135Quante cavane
     Ghe xe mai qua?
Odio! scampemo,
     Presto coremo,
     Àndemo, andemo,
     140Per carità!

[p. 99 modifica]

Trutrù, cavai,
     Via, Toni, dai...
     Ma-ma-ma-mai
     Più torno qua.