Tuti va in colera (1817)
|
Edission original: |
Collezione delle migliori opere scritte in dialetto veneziano, Volume undecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 11.djvu |
| Edission e fonte ▼ |
Tuti va in colera
Che se' crudeli,
El mondo mormora
Che se' infedeli,
Ognun ve biasima,
6Ve acusa ognun
Chi de volubili,
Chi de superbe,
Chi ve mortifica
Da dure e acerbe,
E senza radeghi
12No gh'è nissun.
Se se' dificili
Ne fe' dispeto,
Se tropo facili
Perdè el conceto,
No gh'è giustizia,
18No gh'è perdon.
Chi sente i omeni:
La Dona è dano,
I sarìa anzoli
Senza sto afano,
Vu d'ogni vizio
24Se' l'ocasion.
Donete amabili,
Lassè che i diga,
Vedo che 'l diavolo
Però i castiga,
E ch'i ve spasema
30D'intorno ognun,
Sto gran discredito
Però no i sana,
Tute ste smanie
No li lontana,
Con tuto st'odio
36No stè a dezun.
Ah chi ve carica
De tante acuse
Da sè medesimi
Vol far le scuse
E 'l proprio biasimo
42Giustificar.
Se vu se' cocole,
Se se' amorose,
Se se' inganevoli,
Se se' ambiziose,
Cossa ga i omeni
48Da no acusar?
Vorìa anzi vederli
Co sti fracassi,
Se vu altre femene
Vu li tentassi
Con quele smorfie
54Che femo a vu.
Credeu che 'l vincerli
Sarìa un gran fato?
Che assae dificile
Sarìa el contrato,
E insuperabile
60La so virtù?
Vardè co' pessimi
Ch'i è da so' posta,
Nissun li stuzzega,
Nissun se acosta,
I è lori el diavolo
66Che va a tentar.
Vu se', dolcissime,
Vu le tentae,
E po a sti Satiri
Ghe par assae
Se vu se' docili,
72Se andè a mancar?
Ma per mi dubito
Che 'l mondo andasse,
(Se la modestia
Vostra mancasse)
In precipizio
78Senza più fren;
E che abiè el mento
Che nu no andèmo
Come le bestie
A un vizio estremo,
Che un certo spirito
84Vostro tratien.