Sul pergolo
|
Edission original: |
Albano Baldan, "Versi veneziani", 1906 |
|
Fonte: |
| Edission e fonte ▼ |
Sul pergolo go messo do cussini;
uno per ti, uno per mi; va ben?
Vien qua còcola mia, stemo vissini,
4e godèmose un fià sto bel seren.
Quele manine, che no sta mai quiete,
fame ‘l piassèr, consègnimele a mi,
che mi, ti sentirà, le tegno strete,
8e ze megio per mi e anca per ti.
Ma varda la belessa de sto sielo,
de sto rio, del giardin che ze de là!
Vissin de ti me par tuto più belo…
12(Sta ferma con quel piè, andemo già!)
Senti che bavesela, che frescheto!
Oh, cossa gh’è là in fondo, un consertìn?
Sì sì, tasi, sta ferma, demonieto…
16I sona la chitara e ‘l mandolin.
Ciò, i ga finìo… pecà! Senti, belessa:
conta qualcossa, quel che ti vol ti;
la to vose, ti sa, ze na caressa…
20(No no, no scherzo, te lo digo mi!)
Pàrlime, ma no dirme ogni momento:
“Te vògio ben!”. Ti vol savèr perché?
Perché, ti sa, me sento un missiamento,
24un serto, ti capissi, no so che…
Cossa vustu? No no, no vogio basi,
perché i brusa e no so assicurà:
se ciapo fogo, ciò, tanti ze i casi…
28Ocio! Ah, canàgia, ti me ga magnà…