Sto Secolo
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Ai Lettori | Edission e fonte ▼ | Fin de Secolo → |
El mondo camina,
Le teste se move
Xe questo un gran secolo
Che tuto comove;
De novo s'imagina
Se fa gran scoperte
Col voto più libero
Le porte xe averte.
Credelo el xe un secolo
De some invenzion,
Co' un capitombolo
Se va a rebalton.
No solo el telegrafo,
No solo el vapor,
Ma anca el fonografo
Ga fato furor,
Insieme al telefono
Ed ad altri strumenti,
Se parla assae liberi
E no in mezo ai denti.
Scoperte de fisica
E po' de mecanica
E altre de chimica,
De arte vulcanica,
Segnai semaforici
E le predizion
Del tempo esatissime
Se l'è bruto o bon,
E via discorendo
Co' tuta sta lena
Ghe fin l'istrumento
Che grata la schiena.
Se core prestissimo
Col so velocipide
E se se desmentega
Che l'omo xe un bipide.
De soto l'Oceano
Se vive e respira,
Se core veloci
Coi tram che ve tira.
El mondo volendolo
Co' la dinamite
Se manda per aria
Co' la plancastite.
Insoma in sto secolo
De grandi invenzion
Xe nato credemelo
'Na rivoluzion.
Se trova vechissime
Le cose più bele,
Co’ arte retorica
Se svoda scarsele.
In fato economico
Ghe xe gran scritori;
Ma va tuto al diambarne
Risparmi e sudori.
Se parla co' logica
Alquanto stringente
Che in modo assae facile
Conclude un bel gnente.
Se vede chiarissimo
Da questo che mai
Sicome in ancuo
Ghe tanti spostai.
I usi dei popoli
Xe proprio diversi
Se cambia prestissimo
I boni in perversi.
De l’omo l’instabile
Pensier va de troto
El vol del novissimo,
Ch’el vecio xe roto.
Pur tropo è notissimo
Che sta atmosfera
Vegnùa xe scurissima
Ne la nostra tera.
Se vol novo regime
De vita de Stati
Studià in manicomio
In casa de mati.
No ghe nissunissimo
Che fassa el paron,
El servo è abolio
E messo in canton.
Le robe, i centesimi
Xe cose de tuti
Creadi da Dio
Per esser distruti.
O secolo esempio
Per queli futuri,
Sapienza de popoli
Vegnudi maturi!
Credeme sto secolo
Sarà ricordà
In modo invidiabile
Da chi vegnerà.....
Su via vualtri zoveni,
Coragio per dia
La facile gloria
Sapiè portar via,
Xe questo credelo
El vero momento
De meter in tavola
E! vostro talento.
Lo stato economico
De questo paese
El va tuto a rotoli
Se no ghe chi veda
El modo infalibile
De farlo risorto,
Coragio e no ciacole
Se no el resta morto.
Smetè la retorica,
Che se ancora in fasse,
Via felo risorger.
Co' equanime tasse!
Alora in altissimi
Dirò cose certe
Che questo xe el secolo
De grandi scoperte.